مرزا غالب

اچھا ہے سر انگشتِ حنائی کا تصور
دل میں نظر آتی تو ہے اک بوند لہو کی
رگوں میں دوڑتے پھرنے کے ہم نہیں قائل
جب آنکھ سے ہی نہ ٹپکا تو پھر لہو کیا ہے

حیدر علی آتش

دامن مرے قاتل کا نہ رنگیں ہو لہو سے
ہرچند کہ نزدیک ہو رگ ہائے گلو سے
کرتا ہے وہ سفاک خط شوق کے پرزے
مہندی ملی جاتی ہے کبوتر کے لہو سے
وہ جانِ جاں نہیں آتا تو موت ہی آتی
دل و جگر کو کہاں تک بھلا لہو کرتے

داغ دہلوی

یہ آنکھیں تر جو رہتی ہیں لہو سے
وہ گزرے عشق کے دن آبرو سے
اسے کہیے شہادت نامۂِ عشق
اسے لکھا ہے خط اپنے لہو سے
قاتل اگر نہ شوخ ہو خنجر اگر نہ تیز
رگ رگ میں بے قرار ہمارا لہو نہ ہو
سرخی ہے تیغ پر نہ حنا تیرے ہاتھ میں
قاتل کہیں سفید عدو کا لہو نہ ہو
غش آ نہ جائے دیکھ کے قاتل کو موجِ خوں
نازک مزاج کا کہیں ہلکا لہو نہ ہو

شیخ ابراہیم ذوق

توڑیں اک نالے سے اس کاسۂِ گردوں کو مگر
نوش ہم اس میں کبھو دل کا لہو کرتے ہیں

مصطفٰی خان شیفتہ

بے اشکِ لالہ گوں بھی میں بے آبرو نہیں
آنسو میں رنگ کیا ہو کہ دل میں لہو نہیں

فیض احمد فیض

کفِ باغباں پہ بہارِ گل کا ہے قرض پہلے سے بیشتر
کہ ہر ایک پھول کے پیرہن، میں نمود میرے لہو کی ہے

جون ایلیا

ہر متاع نفس نذر آہنگ کی ہم کو یاراں ہوس تھی بہت رنگ کی
گل زمیں سے ابلنے کو ہے اب لہو تم کہاں جاؤ گے ہم کہاں جائیں گے

قمر جلالوی

چھپے گا خونِ ناحق کس طرح پیشِ خدا قاتل
ترے دامن پہ چھینٹے ، آستینوں پر لہو ہو گا

عرفان صدیقی

خاک سے لہر سی اٹھتی ہے لہو کی صورت
اب کے شاید ہو یہی میرے نمو کی صورت
نکل چلو کہ یہی وقت ہے رہائی کا
ہوا کی لہر‘ بدن کا لہو ہے کتنی دیر
سکوتِ خوف یہاں کو بہ کو پکارتا ہے
نہ اس کی تیغ نہ میرا لہو پکارتا ہے

رئیس فروغؔ

نئے چہروں سے ملنے کے لیے کیا شکل بہتر ہے
پرانے پیرہن پر رنگ کرنا یا لہو کرنا

بیان میرٹھی

لہو ٹپکا کسی کی آرزو سے
ہماری آرزو ٹپکی لہو سے
کیا ہے دامن محشر کو افشاں
اڑے چھینٹے یہ کس کس کے لہو سے

ضیا جالندھری

وہ کون سی سحر تھی کہ روئی نہ پھول پھول
وہ شام کون سی تھی کہ غم سے لہو نہ تھی

عالم تاب تشنہ

حصار مقتلِ جاں میں لہو لہو میں تھا
رسن رسن مری وحشت گلو گلو میں تھا

فارغ بخاری

وہ جس کی گرمی قیامت اٹھا رہی تھی کبھی
اسی بدن کو جو کاٹو تو اب لہو بھی نہیں

خاطر غزنوی

بارشِ سنگِ ملامت اور خلقت شہر کی
پیار کے معصوم جذبوں کا لہو میں اور تو

شاد عظیم آبادی

جگہ دامن میں اپنے کیوں نہ دیتے
کہ طفلِ اشک اپنا ہی لہو تھا
غش آیا اس نے تولی تیغ جب جب
عجب ہلکا ہمارا بھی لہو تھا
بچا قاتل کا دامن للہ الحمد
بہت کھولا ہوا اپنا لہو تھا

فانی بدایونی

اہلِ دنیا مجھے سمجھ لیں گے
دل کسی دن ذرا لہو تو کریں

احمد فراز

کسی جانب سے بھی پرچم نہ لہو کا نکلا
اب کے موسم میں بھی عالم وہی ہو کا نکلا
کیا ایسے کم سخن سے کوئی گفتگو کرے
جو مستقل سکوت سے دل کو لہو کرے
یہ کیا کہ اہلِ ہوس بھی سجائے پھرتے ہیں
دلوں پہ داغ جبیں پر لہو ہماری طرح

قابل اجمیری

جنم جنم کے اندھیروں کو دے رہا ہے شکست
وہ اک چراغ کہ اپنے لہو سے روشن ہے

محسن احسان

سگان کوچہ و بازار سے رہو ہشیار
رہائی دیتے ہیں محسنؔ لہو لہو کر کے
روشنیاں بدن بدن تیرے مرے لہو سے ہیں
لمس کی ساری لذتیں جسم کی ہاؤ ہو سے ہیں

محسن نقوی

عذاب دید میں آنکھیں لہو لہو کر کے
میں شرمسار ہوا تیری جستجو کر کے