مرزا غالب

وہ چیز جس کے لیے ہم کو ہو بہشت عزیز
سوائے بادۂِ گلفامِ مشک بو کیا ہے
ظاہر ہے کہ گھبرا کے نہ بھاگیں گے نکیرین
ہاں منہ سے مگر بادۂِ دوشینہ کی بو آئے

امام بخش ناسخ

کون سا تن ہے کہ مثل روح اس میں تو نہیں
کون گل ہے جو ترا مسکن برنگ بو نہیں
عشق میں بدمست ہوں میں پر کوئی واقف نہیں
نشہ ہے جام مئے الفت میں لیکن بو نہیں

حیدر علی آتش

مرغِ چمن ہوں زمزمہ پیرا بہار آئی
ہنگامہ گرم شیفتۂِ رنگ و بو کریں

داغ دہلوی

ہوا جب سامنا اس خوب رو سے
اڑا ہے رنگِ گل کا پہلے بو سے
وہ گل تکیہ مرے مرقد میں رکھنا
معطر ہو جو زلف مشک بو سے
ممکن نہیں کہ تیری محبت کی بو نہ ہو
کافر اگر ہزار برس دل میں تو نہ ہو
دل کو مسل مسل کے ذرا ہاتھ سونگھئے
ممکن نہیں کہ خونِ تمنا کی بو نہ ہو

شیخ ابراہیم ذوق

اگر یہ جانتے چن چن کے ہم کو توڑیں گے
تو گل کبھی نہ تمنائے رنگ و بو کرتے

مصحفی غلام ہمدانی

سینہ ہے پرزے پرزے جائے رفو نہیں یاں
ٹان کے لگاویں کس کو دل کی تو بو نہیں یاں
مجلس سے اپنی گل کو بھجوا دے پھر چمن میں
کس واسطے کہ اس کا وہ رنگ و بو نہیں یاں
سیراب آبِ جو سے قدح اور قدح سے ہم
سر خوش گلوں کی بو سے قدح اور قدح سے ہم
تجھ بن تو کبھی گل کے تئیں بو نہ کروں میں
مر جاؤں پہ گلشن کی طرف رو نہ کروں میں

مصطفٰی خان شیفتہ

کیا ہو سکے کسی سے علاج اپنا شیفتہ
اس گل پہ غش ہیں جس میں محبت کی بو نہیں
پھر بھی کہو گے چھیڑنے کی اپنی خو نہیں
عطرِ سہاگ ملتے ہو وہ جس میں بو نہیں
گلگشت باغ کس چمن آرا نے کی کہ آج
موجِ بہار مدعی رنگ و بو نہیں

مرزا رفیع سودا

قطرہ کی کھل گئی ہے گرہ ورنہ اے نسیم
شور دماغ مرغِ چمن گل کی بو نہ ہو

میر انیس

وجد ہو بلبل تصویر کو جس کی بو سے
اوس سے گل رنگ کا دعویٰ کرے پھر کس رو سے

یگانہ چنگیزی

سنیں نہ دل سے تو پھر کیا پڑی تھی خاروں کو
کہ گل کو محرم انجام رنگ و بو کرتے
گناہ تھا بھی تو کیسا گناہ بے لذت
قفس میں بیٹھ کے کیا یاد رنگ و بو کرتے

باقی صدیقی

کلی تمہارا تبسم، صبا تمہارا خیال
تمہارے سامنے کیا ذکر رنگ و بو کرتے
خشک پتوں پہ سرشک شبنم
اور کیا حاصل رنگ و بو ہے

جون ایلیا

یہ نہ سوچا تھا زیر سایۂ زلف
کہ بچھڑ جائے گی یہ خوش بو بھی
ہے بکھرنے کو یہ محفل رنگ و بو تم کہاں جاؤ گے ہم کہاں جائیں گے
ہر طرف ہو رہی ہے یہی گفتگو تم کہاں جاؤ گے ہم کہاں جائیں گے

خواجہ میر درد

نے گل کو ہے ثبات نہ ہم کو ہے اعتبار
کس بات پر چمن ہوس رنگ و بو کریں
کیا سیر سب ہم نے گلزار دنیا
گل دوستی میں عجب رنگ و بو ہے

قمر جلالوی

بہار اپنی سمجھ کر اور ہنس لیں یہ چمن والے
بہت روئیں گے جب ظاہر فریبِ رنگ و بو ہو گا
قفس میں خواب جب دیکھ کوئی دیکھا بہاروں کا
دماغِ اہلِ گلشن میں رہی گلشن کی بو برسوں
حفاظتِ گل و غنچہ نہ چار سو کرتے
اگر یہ خار نہ احساسِ رنگ و بو کرتے
قفس میں کیسے بیاں حال رنگ و بو کرتے
پروں کی خیر مناتے کہ گفتگو کرتے

شکیب جلالی

دیدہ ورو بتائیں کیا‘ تم کو یقیں نہ آئے گا
چہرے تھے جن کے چاند سے ‘ سینے میں داغ بو گئے

عرفان صدیقی

ہمارا عہد ہے بے برگ و بار شاخوں سے
اگرچہ قافلۂ رنگ و بو پکارتا ہے

مجید امجد

ہے اس چمن میں نالۂ صد عندلیب بھی
صرف ایک شور قافلۂ رنگ و بو نہیں
شاید اک بھولی تمنا، مٹتے مٹتے جی اٹھے
اور ابھی اس جلوہ زار رنگ و بو میں گھومیے
اپنے د ل کی کھوج میں کھو گئے کیا کیا لوگ
آنسو تپتی ریت میں بو گئے کیا کیا لوگ

اختر شیرانی

نہ بھول کر بھی تمنائے رنگ و بو کرتے
چمن کے پھول اگر تیری آرزو کرتے
یوں تو کس پھول سے رنگت نہ گئی بو نہ گئی
اے محبت مرے پہلو سے مگر تو نہ گئی

بیان میرٹھی

یہ ہے کس کا سویم پوچھا عدو سے
کہ دم ہے ناک میں پھولوں کی بو سے

زہرا نگاہ

وہ نہ جانے کیا سمجھا ذکر موسموں کا تھا
میں نے جانے کیا سوچا بات رنگ و بو کی تھی

ضیا جالندھری

ہم تو فریفتہ تھے ضیاؔ دل کی آنچ پر
منظور محض دل کشی رنگ و بو نہ تھی

علی سردار جعفری

خیالِ یار کو دیجیے وصالِ یار کا نام
شبِ فراق کو گیسوئے مشک بو کہیے

فارغ بخاری

وہ روز و شب بھی نہیں ہیں وہ رنگ و بو بھی نہیں
وہ بزمِ جام و سبو بھی نہیں وہ تو بھی نہیں

تلوک چند محروم

معاف رکھ جو ہے گل ہائے تر سے پیار مجھے
کہ ان میں رنگ ترا کچھ ہے کچھ ہے بو تیری
قفس عذاب سہی بلبل اسیر مگر
ذرا یہ سوچ کہ وہ دام رنگ و بو کیا ہے

جلیل مانک پوری

آج تک دل کی آرزو ہے وہی
پھول مرجھا گیا ہے بو ہے وہی
بہا کر خون میرا مجھ سے بولے
کہ لے جینے سے اپنے ہاتھ دھو لے
جو دل پایا ہے تو چار اشک رو لے
زمیں اچھی ملی ہے بیج بولے
کھلے گی زلف سے خود دل کی چوری
وہ جادو کیا نہ جو سر چڑھ کے بولے

شاد عظیم آبادی

کشت دنیا کیا خبر کیا پھل ملے
تخم غم ہم نے تو آ کر بو دیا

فانی بدایونی

رنگ و بو کیا ہے یہ تو سمجھا دو
سیر دنیائے رنگ و بو تو کریں

احمد فراز

پلٹ کے تجھ کو بھی آنا ہے اس طرف لیکن
لٹا کے قافلۂ رنگ و بو ہماری طرح

اقبال ساجد

کشش تھی پھول سی اس میں تو لا محالہ مجھے
اسیرِ رنگ گرفتار بو بھی ہونا تھا
سنگ دل ہوں اس قدر آنکھیں بھگو سکتا نہیں
میں کہ پتھریلی زمیں میں پھول بو سکتا نہیں
مجھ کو اتنا بھی نہیں ہے سرخ رو ہونے کا شوق
بے سبب تازہ لہو کی فصل بو سکتا نہیں

محسن احسان

ملا بھی کیا اسے توہین رنگ و بو کر کے
گیا چمن سے چمن کو جو بے نمو کر کے
جتنے خزاں کے ڈھنگ ہیں جتنے فضا میں رنگ ہیں
میرے ہی خار و خس سے ہیں میرے ہی رنگ و بو سے ہیں
عجیب جاری ہوا اب کے حکمِ حاکم شہر
اسیر سارے طرف دار رنگ و بو کیے جائیں

محسن نقوی

کھلا مجھ پر کہ میری خوش نصیبی
مرے رستے میں کانٹے بو رہی تھی

ناصر کاظمی

نئے مضمون سجھاتی ہے صبا
کیا ادھر سے وہ سمن بو نکلا
جلوہ ساماں ہے رنگ و بو ہم سے
اس چمن کی ہے آبرو ہم سے
ہم سے روشن ہے کارگاہِ سخن
نفسِ گل ہے مشک بؤ ہم سے