مرزا غالب

اس انجمنِ ناز کی کیا بات ہے غالب
ہم بھی گئے واں اور تری تقدیر کو رو آئے

انشاء اللہ خان انشا

شبِ مہ میں کہتا ہے وہ ماہ سے
رکابی سے اس رو پہ اتنا گھمنڈ

حیدر علی آتش

عاشق ہوں میں نفرت ہے مرے رنگ کو رو سے
پیوند نہیں چاکِ گریباں کو رفو سے
ہوا مہمان آ کر رات بھر وہ شمعِ رو برسوں
رہا روشن مرے گھر کا چراغِ آرزو برسوں
شرمندہ ہوں زمیں میں گڑیں سرخ رو کریں
استادگی جو سرو ترے روبرو کریں
یہ آرزو تھی تجھے گل کے رو بہ رو کرتے
ہم اور بلبل بیتاب گفتگو کرتے
یہ کعبے سے نہیں بے وجہ نسبت رخِ یار
یہ بے سبب نہیں مردے کو قبلہ رو کرتے

داغ دہلوی

ہوا جب سامنا اس خوب رو سے
اڑا ہے رنگِ گل کا پہلے بو سے
ہوا ہے تو تو شاہدِ باز اے دل
بچاؤں تجھ کو کس کس خوب رو سے
ہے تری تصویر کتنی بے حجاب
ہر کسی کے رو بہ رو ہونے لگی
غیر کے ہوتے بھلا اے شام وصل
کیوں ہمارے رو بہ رو ہونے لگی

شیخ ابراہیم ذوق

مرا گھر تیری منزل گاہ ہو ایسے کہاں طالع
خدا جانے کدھر کا چاند آج اے ماہ رو نکلا
خجل اپنے گناہوں سے ہوں میں یاں تک کہ جب رویا
تو جو آنسو مری آنکھوں سے نکلا سرخ رو نکلا
تو جو کہتا ہے کہ دے غیر کو بھی ساغرِ مے
ہاتھ کیا اس کے ہیں اے آئینہ رو ٹوٹ گئے

مصحفی غلام ہمدانی

مذہب کی میرے یار اگر جستجو کریں
مرتے ہوئے مرا نہ سوئے قبلہ رو کریں
زنداں میں اس کے ہیں تو کئی بے گنہ اسیر
غالب کہ روزِ عید انہیں سرخ رو کریں
ستم طرفہ تو یہ ہے کہ مجھے روتا دیکھ
ہنس کے کہتے ہو ذرا اور بھی رو اور سنو
مکھڑے پہ ہے گلال جو اس مستِ ناز کے
رنگیں ہے عکس رو سے قدح اور قدح سے ہم
تجھ بن تو کبھی گل کے تئیں بو نہ کروں میں
مر جاؤں پہ گلشن کی طرف رو نہ کروں میں
کہاں تک اے دلِ شوریدہ تو آنسو بہاوے گا
شب آئی صبح ہونے پر بس اتنا بھی نہ رو کافر

فیض احمد فیض

پھر حریف بہار ہو بیٹھے
جانے کس کس کو آج رو بیٹھے
نہیں ‌خوفِ روزِ سیہ ہمیں، کہ ہے فیض ظرفِ نگاہ میں
ابھی گوشہ گیر وہ اک کرن، جو لگن اس آئینہ رو کی ہے

مرزا رفیع سودا

آئینۂ وجود عدم میں اگر ترا
وہ درمیاں نہ ہو تو کہیں ہم کو رو نہ ہو
گزرے سو گزرے اہلِ زمیں اوپر اے فلک
آئندہ یاں تلک تو کوئی خوب رو نہ ہو
جو شمع تن ہوا شبِ ہجراں میں صرف اشک
پر جس قدر میں چاہے تھا اتنا نہ رو سکا

میر انیس

وجد ہو بلبل تصویر کو جس کی بو سے
اوس سے گل رنگ کا دعویٰ کرے پھر کس رو سے

یگانہ چنگیزی

مزہ گناہ کا جب تھا کہ با وضو کرتے
بتوں کو سجدہ بھی کرتے تو قبلہ رو کرتے

خواجہ میر درد

ہر چند آئنہ ہوں پر اتنا ہوں ناقبول
منہ پھیر لے وہ جس کے مجھے رو بہ رو کریں
نظر میرے دل کی پڑی دردؔ کس پر
جدھر دیکھتا ہوں وہی رو بہ رو ہے

مجید امجد

سانجھ سمے اس کنج میں زندگیوں کی اوٹ
بج گئی کیا کیا بانسری، رو گئے کیا کیا لوگ

مصطفی زیدی

حلف اٹھائے ہیں مجبوریوں نے جس کے لیے
اسے بھی لوگ کسی روز قبلہ رو کرتے

جمال احسانی

ستارے ہی صرف راستوں میں نہ کھو رہے تھے
چراغ اور چاند بھی گلے مل کے رو رہے تھے

ادا جعفری

ایک آئینہ رو بہ رو ہے ابھی
اس کی خوشبو سے گفتگو ہے ابھی

اکبر معصوم

بستر پہ گر رہی ہے سیہ آسماں سے راکھ
وہ چاندنی کہاں ہے وہ مہ رو کہاں گیا

بشیر بدر

کسی کی یاد میں پلکیں ذرا بھگو لیتے
اداس رات کی تنہائیوں میں رو لیتے
دکھوں کا بوجھ اکیلے نہیں سنبھلتا ہے
کہیں وہ ملتا تو اس سے لپٹ کے رو لیتے
ریت بھری ہے ان آنکھوں میں آنسو سے تم دھو لینا
کوئی سوکھا پیڑ ملے تو اس سے لپٹ کے رو لینا
میں نے دریا سے سیکھی ہے پانی کی یہ پردہ داری
اوپر اوپر ہنستے رہنا گہرائی میں رو لینا

ضیا جالندھری

سینے ویران ہوئے انجمن آباد رہی
کتنے گل چہرہ گئے کتنے پری رو آئے

علی سردار جعفری

شکایتیں بھی بہت ہیں حکایتیں بھی بہت
مزا تو جب ہے کہ یاروں کے رو بہ رو کہیے

فارغ بخاری

لگی ہے تیس برس سے ہمارے خوں کی جھڑی
مگر ابھی شجر دار سرخ رو بھی نہیں

تلوک چند محروم

دل و جگر پھکے جاتے ہیں سوزِ ہجراں سے
لگن عذاب ہوئی مجھ کو شمعِ رو تیری

جلیل مانک پوری

جو دل پایا ہے تو چار اشک رو لے
زمیں اچھی ملی ہے بیج بولے

شاد عظیم آبادی

جب کسی نے حال پوچھا رو دیا
چشمِ تر تو نے تو مجھ کو کھو دیا
شادؔ کے آگے بھلا کیا ذکرِ یار
نام ادھر آیا کہ اس نے رو دیا
سینۂ تنگ سے گھبرا کے گیا دل تو گیا
منہ دکھائے نہ مجھے اب یہ سیہ رو اپنا
جہاں پہنچے اسی کا نور پایا
جدھر دیکھا وہی خورشید رو تھا
کاٹے کھاتی ہے مجھے ویرانگی
کون اس مدفن پہ آ کر رو گیا

شان الحق حقی

رو بھی عکس رو بھی میں
میں بھی میں ہوں تو بھی میں
لے کر رخ پر اتنے کلنک
لگتا ہوں خوش رو بھی میں
کر چکا جشنِ بہاراں سے میں توبہ حقیؔ
فصلِ گل آ کے مری جان کو رو جاتی ہے

فانی بدایونی

وہ ادھر رخ ادھر ہے میت کا
لوگ فانیؔ کو قبلہ رو تو کریں

اکبر حمیدی

فقیہ شہر کے فتوے کی حیثیت کیا ہے
تو خود کو اپنی نگاہوں میں سرخ رو رکھنا

احمد فراز

نہ پرسش کو نہ سمجھانے کو آئے
ہمارے یار ہم کو رو گئے کیا

اقبال ساجد

وہ دوست تھا تو اسی کو عدو بھی ہونا تھا
لہو پہن کے مجھے سرخ رو بھی ہونا تھا
تیری بربادی پہ اب آنسو بہاؤں کس لیے
میں تو خود اپنی تباہی پر بھی رو سکتا نہیں

امیر مینائی

پہنچی ہے ہماری اب یہ حالت
جو ہنستے تھے وہ بھی رو رہے ہیں
زانو پہ امیر سر کو رکھے
پھر دن گزرے کہ رو رہے ہیں

شاذ تمکنت

گھر سے نکلوں تو بھرے شہر کے ہنگامے ہیں
میں وہ مجبور تری یاد میں رو بھی نہ سکوں

قابل اجمیری

طلب کی آگ کسی شعلہ رو سے روشن ہے
خیال ہو کہ نظر آرزو سے روشن ہے

مجروح سلطان پوری

جو دیکھتے مری نظروں پہ بندشوں کے ستم
تو یہ نظارے مری بے بسی پہ رو دیتے

محسن احسان

ہماری صبحوں کے بیع نامے لکھنے والوں نے
ہمیں سیاہ کیا خود کو سرخ رو کر کے
خوش ہیں کہ لوٹ آئے ہیں سارے مسافران غم
گرچہ یہ سرخ رو نہیں پھر بھی یہ سرخ رو سے ہیں
خزاں نے جن کے مقدر میں زردیاں لکھ دیں
ہم ان گلاب رتوں کو بھی سرخ رو کیے جائیں

محسن نقوی

یہ کس نے ہم سے لہو کا خراج پھر مانگا
ابھی تو سوئے تھے مقتل کو سرخ رو کر کے
اسے جکڑا ہوا تھا زندگی نے
سرہانے موت بیٹھی رو رہی تھی

ناصر کاظمی

نہ سمجھو تم اسے شور بہاراں
خزاں پتوں میں چھپ کر رو رہی ہے