حیدر علی آتش

تصور سے کسی کے میں نے کی ہے گفتگو برسوں
رہی ہے ایک تصویرِ خیالی روبرو برسوں
شرمندہ ہوں زمیں میں گڑیں سرخ رو کریں
استادگی جو سرو ترے روبرو کریں
حیران کار ہوں ترے رخسار صاف کا
سکتہ ہو آئنہ جو ترے روبرو کریں

داغ دہلوی

خدا جانے چھلاوا تھا کہ بجلی
ابھی نکلا ہے کوئی روبرو سے

شیخ ابراہیم ذوق

ترے آتے ہی آتے کام آخر ہو گیا میرا
رہی حسرت کہ دم میرا نہ تیرے روبرو نکلا
نہ رہتی یوسف کنعاں کی گرمیِ بازار
مقابلے میں جو ہم تجھ کو روبرو کرتے

مصطفٰیٰ خان شیفتہ

یہ کیا کہا کہ بکتے ہو کیوں آپ ہی آپ تم
اے ہم نشیں مگر وہ مرے روبرو نہیں
کس نے سنا دیا دلِ حیرت زدہ کا حال
یہ کیا ہوا کہ آئنہ اب روبرو نہیں

فیض احمد فیض

دیارِ غیر میں محرم اگر نہیں کوئی
تو فیض ذکرِ وطن اپنے روبرو ہی سہی

مرزا رفیع سودا

جھگڑا تو حسن و عشق کا چکتا ہے پل کے بیچ
گر محکمے میں قاضی کے تو روبرو نہ ہو

جون ایلیا

میں نہ ٹھہروں نہ جان تو ٹھہرے
کون لمحوں کے روبرو ٹھہرے

عرفان صدیقی

غبارِ شب مرے چہرے پہ چھایا جاتا ہے
یہ آئینہ بھی ترے روبرو ہے کتنی دیر
ابھی سے راستہ کیوں روکنے لگی دنیا
کھڑے ہوئے ہیں ابھی اپنے روبرو ہم لوگ
وہ مجھ میں بولنے والا تو چپ ہے برسوں سے
یہ کون ہے جو ترے روبرو پکارتا ہے

ادا جعفری

وہ جیسے اک خیال تھا جو زندگی پہ چھا گیا
رفاقتیں تھیں اور یوں کہ روبرو ملا نہیں

بیان میرٹھی

وہ شرمیلی نگاہیں کہہ رہی ہیں
ہٹا دو عکس کو بھی روبرو سے

تلوک چند محروم

رہی فراق میں بھی شکل روبرو تیری
شبیہ کھینچی تصور نے ہو بہ ہو تیری
نظر اٹھا دلِ ناداں یہ جستجو کیا ہے
اسی کا جلوہ تو ہے اور روبرو کیا ہے

خاطر غزنوی

آرزوئیں نارسائی روبرو میں اور تو
کیا عجب قربت تھی وہ بھی میں نہ تو میں اور تو

شاد عظیم آبادی

ہم اپنے ہوش میں باقی تھے ہر طرح
مگر جب تو ہمارے روبرو تھا

اکبر حمیدی

دلوں کو توڑ نہ ڈالے تمہاری حق گوئی
بجائے حرف کے آئینہ روبرو رکھنا

احمد فراز

تجھ کو بھلا کے دل ہے وہ شرمندۂ نظر
اب کوئی حادثہ ہی ترے روبرو کرے

اقبال ساجد

مرے ہی حرف دکھاتے تھے میری شکل مجھے
یہ اشتہار مرے روبرو بھی ہونا تھا

ناصر کاظمی

کوئی اور ہے نہیں تو نہیں مرے روبرو کوئی اور ہے
بڑی دیر میں تجھے دیکھ کر یہ لگا کہ تو کوئی اور ہے