یگانہ چنگیزی

سر جھکائے تری امید پہ بیٹھے ہیں ہم
قاتل اس بارِ امانت کو اتارا ہوتا

سراج الدین ظفر

اصلاح اہلِ ہوش کا یارا نہیں ہمیں
اس قوم پر خدا نے اتارا نہیں ہمیں

قمر جلالوی

اب نزع کا عالم ہے مجھ پر تم اپنی محبت واپس لو
جب کشتی ڈوبنے لگتی ہے تو بوجھ اتارا کرتے ہیں

عرفان صدیقی

سنو، کہ بول رہا ہے وہ سر اتارا ہوا
ہمارا مرنا بھی جینے کا استعارہ ہوا
ٹوٹے ہوئے دلوں کی مناجات ہوں مگر
بہری سماعتوں پہ اتارا گیا ہوں میں

اختر شیرانی

ترکِ دنیا کا یہ دعویٰ ہے فضول اے زاہد
بار ہستی تو ذرا سر سے اتارا ہوتا

غلام محمد قاصر

اب کہنے والے کہتے ہیں اس شہر میں رات نہیں ہوتی
اک ایسا ہی دن تھا وہ چہرہ جب میں نے اتارا آنکھوں میں

ثروت حسین

اپنے لیے تجویز کی شمشیر برہنہ
اور اس کے لیے شاخ سے اک پھول اتارا

اکبر حمیدی

یہ کیا ضرور ہے یہاں عمریں گزار دیں
اک حادثے نے ہم کو اتارا ہے جس طرف

احمد فراز

دوست احباب تو رہ رہ کے گلے ملتے ہیں
کس نے خنجر مرے سینے میں اتارا جانے

محسن احسان

راکھ کچھ دل میں زیادہ ہے شرارا کم ہے
ہم نے اس آئنے میں عکس اتارا کم ہے