یگانہ چنگیزی

ایک ہو جاتی ابھی کافر و دیں دار کی راہ
اگر ان جٹی بھنووں کا اک اشارا ہوتا
نگہِ لطف سے محروم ہوں اب تک ساقی
صفِ آخر کی طرف بھی اک اشارا ہوتا

باقی صدیقی

ساحل سے نہ کیجیے اشارا
کچھ اور بھی دور اب خدا را

سراج الدین ظفر

ہاتھوں میں ہے ہمارے گریبان کائنات
لیکن ابھی جنوں کا اشارا نہیں ہمیں

عرفان صدیقی

روشنیوں کے مالک اب ہم کو رستے کا اشارا دے
کالی رات دیا دے کوئی، جنگل کوئی تارا دے
کیا خبر کون زوالِ شبِ ہجراں دیکھے
ہاں، چراغِ شبِ ہجراں کا اشارا ہے کہ ہم

مجید امجد

دل سے جو ٹیس اٹھی، میں یہ سمجھا، پجاریو
پتھر کے دیوتا کا تڑپتا اشارا تھا

الطاف حسین حالی

یوں بے سبب زمانہ پھرتا نہیں کسی سے
اے آسماں کچھ اس میں تیرا بھی ہے اشارا

اختر شیرانی

کس کو فرصت تھی زمانے کے ستم سہنے کی
گر نہ اس شوخ کی آنکھوں کا اشارا ہوتا

عبید اللہ علیم

کون رکھتا ہے اندھیرے میں دیا آنکھ میں خواب
تیری جانب ہی ترے لوگ اشارا کرتے

جلیل مانک پوری

دل ادھر رخصت ہوا ہوش اس طرف چلتے ہوئے
کس کی آنکھوں نے یہ در پردہ اشارا کر دیا
جلیلؔ اب دل کو اپنا دل نہ سمجھو
کوئی کر کے اشارا جا رہا ہے

حسرت موہانی

جب دیا تم نے رقیبوں کو دیا جامِ شراب
بھول کر بھی مری جانب کو اشارا نہ کیا

فانی بدایونی

یوں چرائیں اس نے آنکھیں سادگی تو دیکھیے
بزم میں گویا مری جانب اشارا کر دیا

اکبر حمیدی

کہتے ہیں ہم ادھر ہیں ستارا ہے جس طرف
میں جانتا ہوں ان کا اشارا ہے جس طرف

فراق گورکھپوری

ہوش جاتا ہے جگر جاتا ہے دل جاتا ہے
پردے ہی پردے میں کیا تیرا اشارا نکلا

محسن احسان

تم کو اندازۂ سیلاب نہیں ہے محسنؔ
بادلوں نے جو کیا کیا وہ اشارا کم ہے

محسن نقوی

زخم آنکھوں کے بھی سہتے تھے کبھی دل والے
اب تو ابرو کا اشارا نہیں دیکھا جاتا