مرزا غالب

فرصتِ کاروبارِ شوق کسے
ذوقِ نظارۂِ جمال کہاں
حسنِ مہ گرچہ بہ ہنگامِ کمال اچھا ہے
اس سے میرا مہِ خورشید جمال اچھا ہے

انشاء اللہ خان انشا

میں تو ہر چند بچاتا ہوں ولیکن ہیہات
کھب ہی جاتا ہے ان آنکھوں میں جمال ایک نہ ایک

حیدر علی آتش

سنا جمیل بھی تیرا جو نام اے محبوب
ہزار جان سے دل بندۂِ جمال ہوا
ہنگام نزع محو ہوں تیرے خیال کا
مشتاق ہوں فرشتۂِ صاحبِ جمال کا
آتشؔ لحد سے اٹھوں گا کہتا یہ روزِ حشر
مشتاق ہوں میں یار کے حسن و جمال کا
بلائے جاں مجھے ہر ایک خوش جمال ہوا
چھری جو تیز ہوئی پہلے میں حلال ہوا

مصحفی غلام ہمدانی

چمکی بجلی سی پر نہ سمجھے ہم
حسن تھا یا جمال تھا کیا تھا

مصطفٰی خان شیفتہ

ناز و غرور ٹھیک ہے ، جور و جفا درست
کس کے ہوا نصیب یہ حسن اور یہ جمال

باقی صدیقی

کبھی پیام قضا ہے ، کبھی نوید حیات
تمام عمر معمہ رہا تمہارا جمال

جون ایلیا

قرب جمال اور ہم عیش وصال اور ہم
ہاں یہ ہوا کہ ساکن شہر جمال ہو گئے
وہ جسم جمال تھا سراپا
اور مجھ کو جمال چاہیے تھا

اختر شیرانی

اس ادا سے کون یہ جلوہ گر سر بزمِ حسنِ خیال ہے
جو نفس ہے مست بہار ہے جو نظر ہے غرق جمال ہے

ادا جعفری

آ دیکھ کہ میرے آنسوؤں میں
یہ کس کا جمال آ گیا ہے
خود حجابوں سا خود جمال سا تھا
دل کا عالم بھی بے مثال سا تھا

علی سردار جعفری

خوگر روئے خوش جمال ہیں ہم
ناز پروردۂ وصال ہیں ہم
کس کی رعنائیِ خیال ہے تو
تیری رعنائی جمال ہیں ہم

غلام محمد قاصر

نظر نظر میں ادائے جمال رکھتے تھے
ہم ایک شخص کا کتنا خیال رکھتے تھے

ماجد صدیقی

شیشے کے اک فریم میں کچھ نقش قید تھے
میری نظر لگی تھی کسی کے جمال پر
مجھ برگِ خشک سے کہ ابھی ہوں جو ڈال پر
آنے لگا ہے حرف، چمن کے جمال پر

تلوک چند محروم

حسرتِ دید لے چلے ہم تو
آپ دیکھا کریں جمال اپنا
تابِ نظارہ نہیں گو مجھے خود بھی لیکن
رشک کہتا ہے کہ ایسا ہی جمال اچھا ہے

جلیل مانک پوری

آئینہ ہے جو ان کا مصاحب تو کیا ہوا
ہم بھی کبھی تھے دیکھنے والے جمال کے
دلِ بیتاب کو پہلو میں مچلتے کیا دیر
سن لے اتنا کسی کافر کا جمال اچھا ہے
صحبت آئینے سے بچپن میں خدا خیر کرے
وہ ابھی سے کہیں سمجھیں نہ جمال اچھا ہے
چشم و دل جس کے ہوں مشتاق وہ صورت اچھی
جس کی تعریف ہو گھر گھر وہ جمال اچھا ہے

خاطر غزنوی

ہے گرم ملکوں کا سورج ترے جلال کی گرد
غرور کاہکشاں ہے ترے جمال کی گرد

سیف الدین سیف

شاید تری سادگی نے اب تک
دیکھا ہی نہیں جمال اپنا

سیماب اکبر آبادی

دل کی بساط کیا تھی نگاہ جمال میں
اک آئینہ تھا ٹوٹ گیا دیکھ بھال میں
سیمابؔ اجتہاد ہے حسنِ طلب مرا
ترمیم چاہتا ہوں مذاق جمال میں