مرزا غالب

دل تو دل وہ دماغ بھی نہ رہا
شور سودائے خط و خال کہاں

انشاء اللہ خان انشا

رہ گیا تیرے مکھڑے پر باقی
اب مکاں خال خال بوسے کا

حیدر علی آتش

رہا بہار و خزاں میں یہ حال سودے کا
بڑھا تو زلف ہوا گھٹ گیا تو خال ہوا
اے دل قضا نہ آئے ادھر ٹکٹکی نہ باندھ
گولی کا سامنا ہے یہ نظارہ خال کا

مصحفی غلام ہمدانی

دل اپنا ہنوز سادگی سے
پیچیدہ ہے زلف و خال کے ساتھ
پڑھ نہ اے ہم نشیں وصال کا شعر
جس سے رنگیں ہو خط و خال کا شعر
کس طرح روزِ حشر وہ ہوویں گے سرخ رو
دیکھا کیے ہیں یاں جو خط و خال کی کتاب
رہتا ہے مری زباں پہ تجھ بن
افسانۂِ زلف و خال دن رات

فیض احمد فیض

وہ نظر بہم نہ پہنچی کہ محیطِ حسن کرتے
تری دید کے وسیلے خد و خال تک نہ پہنچے

مرزا رفیع سودا

سوداؔ جو ان نے باندھا زلفوں میں دل سزا ہے
شعروں میں اس کے تو نے کیوں خط و خال باندھے

جون ایلیا

کفر و ایماں کہا گیا جس کو
بات وہ خد و خال کی ہو گی
خیال و وہم سے برتر ہے اس کی ذات سو وہ
نہایت ہوس خد و خال ہے شاید

شکیب جلالی

یوں بے سبب تو کوئی انہیں پوجتا نہیں
کچھ تو ہے پتھروں میں خد و خال کی طرح

عرفان صدیقی

یہ میرا عکس دروں ہے یقیں نہیں آتا
اس آئینے میں مرے خط و خال دوسرے ہیں
ہم اہلِ شعر جو حسنِ خیال سے بھی گئے
تو دلبرانِ غزل خط و خال سے بھی گئے

ماجد صدیقی

دن ترے پیار کا اجالا ہے
شب ترے عارضوں کا مدھم خال

تلوک چند محروم

طائرِ دل کے لیے زلف کا جال اچھا ہے
حیلہ سازی کے لیے دانۂ خال اچھا ہے

عزیز حامد مدنی

چراغ بزم ابھی جان انجمن نہ بجھا
کہ یہ بجھا تو ترے خط و خال سے بھی گئے

محسن احسان

گم اس قدر ہوئے آئینۂ جمال میں ہم
اسی کو ڈھونڈتے ہیں اس کے خد و خال میں ہم