مرزا غالب

اپنا احوالِ دلِ زار کہوں یا نہ کہوں
ہے حیا مانعِ اظہار، کہوں یا نہ کہوں
آتش کدہ ہے سینہ مرا رازِ نہاں سے
اے وائے اگر معرضِ اظہار میں آوے

مرزا رفیع سودا

پوچھے خدا سبب جو مرے اشتیاق کا
میری زباں سے ہو یہی اظہار دیکھنا

جگر مراد آبادی

ہشیار ہو اے بے خود و سرشار محبت
اظہارِ محبت! ارے اظہارِ محبت

عرفان صدیقی

یہ آئنہ گفتار کوئی اور ہے مجھ میں
سوچا بھی نہ تھا میں نے جو اظہار میں آیا

الطاف حسین حالی

بات جو دل میں چھپاتے نہیں بنتی حالیؔ
سخت مشکل ہے کہ وہ قابل اظہار نہیں

زہرا نگاہ

یوں کہنے کو پیرایۂ اظہار بہت ہے
یہ دل دلِ ناداں سہی خوددار بہت ہے

غلام محمد قاصر

دل میں مقتول کی تصویر لیے پھرتا ہوں
اور قاتل سے عقیدت کا بھی اظہار کروں

ماجد صدیقی

تھا میسر ہی نہ پیرایۂ اظہار ہمیں
ورنہ اس شہر میں کیا کیا تھے نہ آزار ہمیں

جلیل مانک پوری

رازِ عشق اظہار کے قابل نہیں
جرم یہ اقرار کے قابل نہیں
خامشی میری یہ کہتی ہے جلیلؔ
دردِ دل اظہار کے قابل نہیں

حسرت موہانی

پرسشِ حال پہ ہے خاطر جاناں مائل
جرأت کوشش اظہار کہاں سے لاؤں

سیف الدین سیف

سیفؔ اتنا بھی نہ کر ضبط کہ پھر ان کے حضور
خامشی درد کا اظہار نظر آنے لگے

سیماب اکبر آبادی

غمِ پنہاں سے دم گھٹتا ہے اے سیمابؔ کیا کہیے
خدا ایسا کرے یہ قابل اظہار ہو جائے

شبلی نعمانی

آپ جاتے تو ہیں اس بزم میں لیکن شبلیؔ
حالِ دل دیکھیے اظہار نہ ہونے پائے

احمد فراز

لوگ لب بستہ اگر ہوں تو نکل آتی ہیں
چپ کے پیرایۂ اظہار سے باتیں کیا کیا
کیا کریں عرضِ تمنا کہ تجھے دیکھتے ہی
لفظ پیرایۂ اظہار میں گم ہو جائیں
تو لاکھ فراز اپنی شکستوں کو چھپائے
یہ چپ تو ترے کرب کا اظہار کرے ہے

فراق گورکھپوری

تجھ سے ہمت تو پڑی عشق کو کچھ کہنے کی
خیر شکوہ نہ سہی شکر کا اظہار تو ہے

قتیل شفائی

لفظ چنتا ہوں تو مفہوم بدل جاتا ہے
اک نہ اک خوف بھی ہے جرأت اظہار کے ساتھ
سکوت چھایا ہے انسانیت کی قدر وں پر
یہی ہے موقع اظہار آؤ سچ بولیں
سچ بات پہ ملتا ہے سدا زہر کا پیالہ
جینا ہے تو پھر جینے کا اظہار نہ مانگو
لکھ دیا اپنے در پہ کسی نے اس جگہ پیار کرنا منع ہے
پیار اگر ہو بھی جائے کسی کو اس کا اظہار کرنا منع ہے
اب تو کھل جائے گا شاید تری الفت کا بھرم
اہلِ دل جرأت اظہار تک آ پہنچے ہیں
لگی ہوئی ہیں ضمیر حیات پر مہریں
کسی میں جرأت اظہار بھی نہیں باقی

محسن احسان

ہم بھی زندہ ہیں عجب کاوش اظہار کے ساتھ
گفتگو کرتے ہیں گھر کے در و دیوار کے ساتھ

محسن نقوی

تو نے اپنی زلف کے سائے میں افسانے کہے
مجھ کو زنجیریں ملی ہیں جرأت اظہار پر