مرزا غالب

جب وہ جمالِ دل فروز، صورتِ مہرِ نیم روز
آپ ہی ہو نظارہ سوز، پردے میں منہ چھپائے کیوں؟
غیر پھرتا ہے لیے یوں ترے خط کو کہ ، اگر
کوئی پوچھے کہ یہ کیا ہے ، تو چھپائے نہ بنے

مصطفٰیٰ خان شیفتہ

آخر دو رنگی اس گلِ رعنا پہ کھل گئ
لوگوں کو دیکھ کر جو عدو نے چھپائے گل

میر مہدی مجروح

شوخیاں خود ہیں پردہ در ان کی
کیوں وہ منہ کو چھپائے بیٹھے ہیں
طور جس آگ نے جلایا تھا
ہم وہ دل میں چھپائے بیٹھے ہیں

باقی صدیقی

دامن بھی نہ ہو جسے میسر
زخموں کو وہ کس طرح چھپائے
زمانے کی آنکھوں میں نور آ گیا ہے
کوئی اپنے دامن کے دھبے چھپائے

رئیس فروغؔ

اس کو دل میں بسا کے میں اس سے
دل کی ویرانیاں چھپائے گیا
نہ سناؤ کہ اپنے پرائے ہوئے
ملو سارے ملال چھپائے ہوئے

اسرار الحق مجاز

سینے میں ان کے جلوے چھپائے ہوئے تو ہیں
ہم اپنے دل کو طور بنائے ہوئے تو ہیں

شکیل بدایونی

کیوں اک طرف نگاہ جمائے ہوئے ہو تم
کیا راز ہے جو مجھ سے چھپائے ہوئے ہو تم

فانی بدایونی

ادا سے آڑ میں خنجر کے منہ چھپائے ہوئے
مری قضا کو وہ لائے دلہن بنائے ہوئے

اختر ہوشیارپوری

مرے بدن کو لہو رنگ پیرہن بھی دے
مری قبا سے مرے زخم بھی چھپائے وہ

افضل منہاس

ہوا کے پھول مہکنے لگے مجھے پا کر
میں پہلی بار ہنسا زخم کو چھپائے ہوئے

کیف بھوپالی

اعتکاف میں زاہد منہ چھپائے بیٹھا ہے
غالباً زمانے سے مات کھائے بیٹھا ہے
کیوں سنا نہیں دیتا فیصلہ مقدر کا
نامہ بر مرے آگے خط چھپائے بیٹھا ہے

کیفی اعظمی

رہ گئی زندگی درد بن کے
دردِ دل میں چھپائے چھپائے

ناصر کاظمی

راہوں پہ ادا ادا سے رقصاں
آنچل میں حیا سے منہ چھپائے