مرزا غالب

رو میں ہے رخشِ عمر، کہاں دیکھیے تھمے
نے ہاتھ باگ پر ہے نہ پا ہے رکاب میں

حیدر علی آتش

اک ترک شہسوار کی دیوانی روح ہے
زنجیر میں ہمارے ہو لوہا رکاب کا

داغ دہلوی

تم آؤ جب سوار تو سن ناز
قیامت ہم رکاب آئے نہ آئے

شیخ ابراہیم ذوق

شکار بستۂِ فتراک کو ترے مقدور
ہوا نہ یہ بھی کہ بوسہ سر رکاب تو دے

مصحفی غلام ہمدانی

تو ہے وہ بلا کہ ماہ و خورشید
زلفوں کی ترے رکاب میں ہے
مہ نے اے شہسوار عرصۂِ حسن
عاقبت دی تری رکاب میں جان

جون ایلیا

اپنی منزل نہیں کوئی فریاد
رخش بھی اپنا بد رکاب نہیں
جو بھی دشتِ طلب کا ہے پس رو
وہی زریں رکاب ہے سو ہے

شکیب جلالی

رہبر ہی نہیں ہے ساتھ اپنے
رہزن بھی ہیں ہم رکاب یارو

عرفان صدیقی

پرند جھیلوں پہ آتے ہیں لوٹنے کے لیے
سبھی رکے ہوئے لشکر رکاب کرتے ہیں
اب اس زمیں پہ شہ سوار لوٹ کر نہ آئیں گے
سو یہ سفر غبارِ ہم رکاب کے لیے نہیں

ظہیر کاشمیری

کب اس سیاہ بخت نے چھوڑا کسی کا ساتھ
دشتِ جنوں میں سایہ مرا ہم رکاب تھا

فانی بدایونی

قبر پر کس شان سے وہ بے نقاب آنے کو ہے
آفتاب صبح محشر ہم رکاب آنے کو ہے

امیر مینائی

تمہیں نے قتل کیا ہے مجھے جو تنتے ہو
اکیلے تھے ملکُ الموت ہم رکاب نہ تھا
رکھا یہ تم نے پائے حنائی رکاب میں
یا پھول بھر دیے طبقِ آفتاب میں

فراق گورکھپوری

سوار ابلق ایام موسمِ گل ہے
چمن کے شعلے ہیں یا حلقۂ رکاب کی آنچ