مرزا غالب

اسدؔ اللہ خاں تمام ہوا
اے دریغا وہ رند شاہدِ باز
ہیں بسکہ جوشِ بادہ سے شیشے اچھل رہے
ہر گوشۂِ بساط ہے سر شیشہ باز کا
کاوش کا دل کرے ہے تقاضا کہ ہے ہنوز
ناخن پہ قرض اس گرہِ نیم باز کا

شیخ ابراہیم ذوق

دروازہ مے کدے کا نہ کر بند محتسب
ظالم خدا سے ڈر کہ در توبہ باز ہے

مصحفی غلام ہمدانی

گو کہ آنکھیں لڑائیں ہم اس سے
یاں نظر باز کون ہے اپنا
کرتا ہوں میں دزدیدہ نظر گر کبھی اس پر
نظروں میں پرکھ لے ہے نظر باز تو دیکھو
ہمارا مرغِ دل چھوڑا نہ آخر اس شکاری نے
گہے شاہین پھینکے اس پہ گاہے باز سے مارا
آساں نہیں ہے تنہا در اس کا باز کرنا
لازم ہے پاسباں سے اب ہم کو ساز کرنا
ہووے گی صبحِ روشن اک دم میں وصل کی شب
بندِ قبا کو اپنے ظالم نہ باز کرنا

مصطفٰی خان شیفتہ

لگتی نہیں پلک سے پلک جو تمام شب
ہے ایک شعبدہ مژہِ نیم باز کا

مومن خان مومن

کیوں کہ نہ آدھی آدھی رات جاگے وہ جس کا دھیان ہو
آہوئے نیم خواب میں نرگس نیم باز میں
اربابِ ہوس ہار کے بھی جان پہ کھیلے
کم طالعی عاشق جاں باز تو دیکھو

فیض احمد فیض

لو وصل کی ساعت آ پہنچی، پھر حکمِ حضوری پر ہم نے
آنکھوں کے دریچے بند کیے ، اور سینے کا در باز کیا

باقی صدیقی

کس توقع پہ صدا دیں باقیؔ
در اربابِ کرم باز تو ہے

قمر جلالوی

اے دعائے دلِ مجبور وہاں جا تو سہی
لوٹ آنا درِ مقبول اگر باز نہ ہو

عرفان صدیقی

ہوا کا چلنا‘ دریچوں کا باز ہو جانا
ذرا سی بات پہ دل کا گداز ہو جانا

حسرت موہانی

غمِ جہاں سے جسے ہو فراغ کی خواہش
وہ ان کے دردِ محبت سے ساز باز کرے

شاد عظیم آبادی

اب بھی اک عمر پہ جینے کا نہ انداز آیا
زندگی چھوڑ دے پیچھا مرا میں باز آیا

عزیز حامد مدنی

اک منظر کنارۂ بام اور دے گیا
پرتو سا کوئی اس کے در باز سے اٹھا

شاذ تمکنت

اگر احتیاط خطاب ہو لب سنگ کھل کے گلاب ہو
تو کسی صنم کو صدا تو دے در بت کدہ ابھی باز ہے
ہمہ تن جنوں ہوں پھر بھی رہے کچھ تو پردہ داری
کہ برا نہیں خرد سے کوئی ساز باز رکھنا
مرے ناخن‌ وفا پر کوئی قرض رہ نہ جائے
ترے دل میں جو گرہ ہے اسے نیم باز رکھنا

فراق گورکھپوری

تنگی و وسعت کونین میں نسبت کیسی
در توبہ سے در میکدہ ہو باز جدا