باقی صدیقی

زندگی کا راز پانے کے لیے
زندگی کی راہ میں آنا پڑا

جگر مراد آبادی

مجھ کو اسی دھن میں ہے ہر لحظہ بسر کرنا
اب آئے وہ اب آئے لازم انہیں آنا ہے

عبدالحمید عدم

مے خانۂ ہستی میں اکثر ہم اپنا ٹھکانہ بھول گئے
یا ہوش میں جانا بھول گئے یا ہوش میں آنا بھول گئے

قمر جلالوی

چمن والو قفس کی قید بے میعاد ہوتی ہے
تمھیں آؤ تو آ جانا میرا آنا تو کیا ہو گا
بھلا اہلِ جنوں سے ترکِ ویرانہ تو کیا ہو گا
خبر آئے گی ان کی ان کا اب آنا تو کیا ہو گا
یہی ہے گر خوشی تو رات بھر گنتے رہو تارے
قمر اس چاندنی میں ان کا اب آنا تو کیا ہو گا

عرفان صدیقی

ایک چلو سے بھرے گھر کا بھلا کیا ہو گا
ہم کو بھی نہر سے پیاسا پلٹ آنا اچھا
میں کیوں ڈروں کہ جان سے جاتا ہوں ایک بار
دشمن کو میرے لوٹ کے آنا بھی ہوتا ہے

زہرا نگاہ

نقش کی طرح ابھرنا بھی تمہی سے سیکھا
رفتہ رفتہ نظر آنا بھی تمہی سے سیکھا

غلام محمد قاصر

مہکے تھے چراغ اور دہک اٹھی تھیں کلیاں
گو سب کو خبر تھی اسے آنا ہی نہیں تھا

جلیل مانک پوری

موت کا آنا بھی دیکھا بارہا
پر کسی پر دل کا آنا اور ہے

حسرت موہانی

غیر کی نظروں سے بچ کر سب کی مرضی کے خلاف
وہ ترا چوری چھپے راتوں کو آنا یاد ہے
دوپہر کی دھوپ میں میرے بلانے کے لیے
وہ ترا کوٹھے پہ ننگے پاؤں آنا یاد ہے

سلام مچھلی شہری

اگرچہ طوفان رنگ و بو کی شریر لہروں سے تھک چکے ہیں
مگر وہ دل کے نئے تلاطم کی زد میں آنا بھی چاہتے ہیں

سیماب اکبر آبادی

ارمان تجلی کا کوتاہ بھی کر قصہ
اے دوست تجھے آخر اک دن نظر آنا ہے

شان الحق حقی

دنیا ہی کی راہ پہ آخر رفتہ رفتہ آنا ہو گا
درد بھی دے گا ساتھ کہاں تک بیدل ہی بن جانا ہو گا

شبلی نعمانی

دردِ فرقت سے ترے ضعف ہے ایسا ہم کو
خواب میں بھی ترے دشوار ہے آنا ہم کو

احمد فراز

ڈھلتی نہ تھی کسی بھی جتن سے شبِ فراق
اے مرگِ ناگہاں ترا آنا بہت ہوا

امیر مینائی

نہ جہت تیرے لیے ہے نہ کوئی جسم ہے تو
چشم ظاہر کو ہے مشکل نظر آنا تیرا

قتیل شفائی

تھک گیا میں کرتے کرتے یاد تجھ کو
اب تجھے میں یاد آنا چاہتا ہوں