باقی صدیقی

سائے میں بیٹھے ہوئے سوچتے ہیں
کون اس دھوپ میں چلتا ہو گا
یہ نشاں کیسے ہیں باقیؔ دیکھنا
کون دل کی راکھ پر چلتا رہا
گرد راہوں پہ جمی ہے باقیؔ
کیسی منزل کوئی چلتا بھی نہیں

رئیس فروغؔ

کوئی دو قدم ساتھ چلتا نہیں
مگر میں بھی رستہ بدلتا نہیں

عالم تاب تشنہ

میں جب بھی گھر سے نکلتا ہوں رات کو تنہا
چراغ لے کے کوئی ساتھ ساتھ چلتا ہے
گزار دیتے ہیں آوارہ گرد آگ کے گرد
جو بے ٹھکانہ ہیں ان کا بھی کام چلتا ہے

رسا چغتائی

جب بھی تیری یادوں کا سلسلہ سا چلتا ہے
اک چراغ بجھتا ہے اک چراغ جلتا ہے
شرط غم گساری ہے ورنہ یوں تو سایہ بھی
دور دور رہتا ہے ساتھ ساتھ چلتا ہے
کیسے کیسے ہنگامے اٹھ کے رہ گئے دل میں
کچھ پتہ مگر ان کا آنسوؤں سے چلتا ہے

محسن احسان

اگر ہے مقتل جاناں کا رخ تو اے محسنؔ
ذرا ٹھہر کہ ترے ساتھ میں بھی چلتا ہوں
شعار عجز و ذوق انکسار
یہ سکہ شہر میں چلتا کہاں ہے

ناصر کاظمی

ایک طرف کچھ کچے گھر تھے
ایک طرف نالہ چلتا تھا
تیری ہلال سی انگلی پکڑے
میں کوسوں پیدل چلتا تھا