مرزا غالب

وہ سحر مدعا طلبی میں کام نہ آئے
جس سحر سے سفینہ رواں ہو سراب میں

امام بخش ناسخ

بہت فریب سے ہم وحشیوں کو وحشت ہے
ہمارے دشت میں ناسخؔ کہیں سراب نہیں

انشاء اللہ خان انشا

اپنی امید تھی سو بر آئی
یاس شکل سراب باقی ہے

میر انیس

کبھی شقی متمتع نہ ہوں گے دنیا سے
جسے یہ آب اسے ہم سراب سمجھے ہیں

باقی صدیقی

آب مانگو، سراب ملتا ہے
اس طرح بھی جواب ملتا ہے

جون ایلیا

میں شرابی ہوں میری آس نہ چھین
تو مری آس ہے سراب نہیں
تر ہے دشت اس کے عکس منظر سے
اور خود وہ سراب ہے سو ہے
سرِ صحرا حباب بیچے ہیں
لب دریا سراب بیچے ہیں
تشنگی نے سراب ہی لکھا
خواب دیکھا تھا خواب ہی لکھا

سراج الدین ظفر

سب ماسوائے عشق فریبِ سراب ہے
میں بھی ہوں خواب میری جوانی بھی خواب ہے

شکیب جلالی

اتریں عجیب روشنیاں رات خواب میں
کیا کیا نہ عکس تیر رہے تھے سراب میں
تاحدِ خیال ریگِ صحرا
تاحدِ نظر سراب یارو

عرفان صدیقی

بہت غرور ہے اے آبجو‘ تو آج تجھے
ہم اپنی تشنہ لبی سے سراب کرتے ہیں

رسا چغتائی

زندگی کے سراب بھی دیکھوں
نیند آئے تو خواب بھی دیکھوں

فانی بدایونی

جلوۂ رنگ ہے نیرنگ تقاضائے نگاہ
کوئی مجبور تماشائے سراب آتا ہے

احمد فراز

وہ سامنے ہے مگر تشنگی نہیں جاتی
یہ کیا ستم ہے کہ دریا سراب جیسا ہے
فرازؔ کس نے مرے مقدر میں لکھ دیے ہیں
بس ایک دریا کی دوستی میں سراب سارے

امیر مینائی

حاجت نہیں تو دولتِ دنیا سے کام کیا
پھنستا ہے تشنہ دام فریبِ سراب میں

شاذ تمکنت

ہماری پیاس نے وہ بھی نظارہ دیکھ لیا
رواں دواں کوئی دریا سراب جیسا تھا

فراق گورکھپوری

جہاں کے باب میں تر دامنوں کا قول یہ ہے
یہ موج مارتا دریا کوئی سراب نہیں
جسے سمجھتے ہیں سب موجِ کوثر و تسنیم
وہ آئنہ بھی ہے تپتے ہوئے سراب کی آنچ

قتیل شفائی

کروں تلاش جواہر تو ریت ہاتھ آئے
سمندروں کا چلن بھی سراب جیسا ہے