مرزا غالب

وحشت و شیفتہ اب مرثیہ کہویں شاید
مر گیا غالب آشفتہ نوا، کہتے ہیں

مصحفی غلام ہمدانی

ابھی اپنے مرتبۂِ حسن سے میاں با خبر تو ہوا نہیں
کہ غزل سرا ترے باغ میں کوئی مرغ تازہ نوا نہیں
گوشِ شنوا ہو تو مرے رمز کو سمجھے
حق یہ ہے کہ میں ساز حقیقت کی نوا ہوں
ہر نفس تازہ غزل کہتے ہیں
ہر نفس تازہ نوا بندی ہے

مصطفٰی خان شیفتہ

کیا لائقِ زکوٰۃ کوئی بے نوا نہ تھا
انفاسِ باد میں نفسِ آشنا نہ تھا
نان و نمک کی تھی ہمیں توفیق شیفتہ
ساز و نوا کے واسطے برگ و نوا نہ تھا

مرزا رفیع سودا

ستم روا ہے اسیروں پہ اس قدر صیاد
چمن چمن کہیں بلبلِ کی اب نوا بھی ہے

باقی صدیقی

ہم سخن ہے نہ ہم نوا کوئی
کس توقع پہ دے صدا کوئی
کسی کنجِ طرب میں دم لیتے
مرغ آزاد کی نوا سنتے

سراج الدین ظفر

جن میں نہ جوش ہو ظفرؔ وہ مرے زمزمے نہیں
دل سے جو کھیلتی اٹھے اس کو مری نوا سمجھ

عرفان صدیقی

آسماں تا آسماں سنسان سناٹے کی جھیل
دائرہ در دائرہ میری نوا، جیسے ہوا
اب بھی چپ رہتے تو مجرم نظر آتے ورنہ
سچ تو یہ ہے کہ ہمیں شوقِ نوا کچھ بھی نہ تھا
بام و در پر ایک سناٹا عزا کرتا تھا رات
کیسا نالہ وہ فقیر بے نوا کرتا تھا رات
میں انتظار میں ہوں کون اسے شکار کرے
بہت دنوں سے ہے میری نوا نشانے پر
ڈوبتی شام پرندوں کی نوا بھی خاموش
دل میں سناٹا تو باہر کی فضا بھی خاموش
مری طرف تری موج نوا چلی ہی نہیں
ہوا کبھی سر دشتِ بلا چلی ہی نہیں
ہم سے وہ جانِ سخن ربطِ نوا چاہتی ہے
چاند ہے اور چراغوں سے ضیا چاہتی ہے

الطاف حسین حالی

سخت افسردہ طبع تھی احباب
ہم کو جادو نوا کیا تو نے

عالم تاب تشنہ

یہ کہنا قریۂ جاں میں ہیں دم بخود سب لوگ
تمام شہر ہوا مقتل نوا کہنا

عبید اللہ علیم

آنکھوں میں کچھ نہیں ہے بجز خاکِ رہ گزر
سینے میں کچھ نہیں ہے بجز نالہ و نوا
بے سبب غم میں سلگنا مری عادت ہی سہی
ساز خاموش ہے کیوں شعلہ نوا کیوں چپ ہے

علی سردار جعفری

کہیں رہ گئی ہو شاید ترے دل کی دھڑکنوں میں
کبھی سن سکے تو سن لے مری خوں شدہ نوا کو
جس میں ہو سطوت شاہین کی پرواز کا رنگ
لب شاعر سے وہ بلبلِ کی نوا مانگتے ہیں

ماجد صدیقی

جب سے جلے ہیں باغ میں برق سے بال و پر مرے
کہنے لگی ہے خلق بھی ماجدؔ بے نوا مجھے

جوش ملیح آبادی

کیا کہہ کے پھول بنتی ہیں کلیاں گلاب کی
یہ راز مجھ سے بلبل شیریں نوا نہ پوچھ

شان الحق حقی

گراں ہیں کان پہ ان کے وہی سخن جو ابھی
ادا ہوئے بھی نہیں نطق بے نوا سے مرے
نشاط و رنگ کے خوگر مجھے معاف رکھیں
چھلک پڑے جو لہو ساز خوش نوا سے مرے

اختر ہوشیارپوری

مری نگاہ کا پیغام بے صدا جو ہوا
وہ میری بات سنے کیوں میں بے نوا جو ہوا

احمد فراز

یہ اہلِ درد بھی کس کی دہائی دیتے ہیں
وہ چپ بھی ہو تو زمانہ ہے ہم نوا اس کا
کوئی نسبت کبھی اے جانِ سخن
کسی محروم نوا سے تیری
ستم تو یہ ہے کہ عہد ستم کے جاتے ہی
تمام خلق مری ہم نوا نکلتی ہے
سب اپنے اپنے فسانے سناتے جاتے ہیں
نگاہِ یار مگر ہم نوا کسی کی نہیں

شاذ تمکنت

رنگ لایا مرا بے برگ و نوا ہو جانا
اتنا آسان نہ تھا اس کا خدا ہو جانا

قتیل شفائی

ہر بے زباں کو شعلہ نوا کہہ لیا کرو
یارو سکوت ہی کو صدا کہہ لیا کرو

مجروح سلطان پوری

چمن ہے مقتل نغمہ اب اور کیا کہیے
بس اک سکوت کا عالم جسے نوا کہیے

ناصر کاظمی

دل میں اب خارِ تمنا بھی نہیں
زندگی برگ و نوا چاہتی ہے
رنگ منت کشِ آواز نہیں
گل بھی ہے ایک نوا غور سے سن
ہر شے پکارتی ہے پس پردۂسکوت
لیکن کسے سناؤں کوئی ہم نوا بھی ہو
جب صبح کو چڑیاں باری باری بولتی ہیں
کوئی نامانوس اداس نوا کچھ کہتی ہے