جون ایلیا

یوں جو تکتا ہے آسمان کو تو
کوئی رہتا ہے آسمان میں کیا
یوں تو ہم دم بہ دم زمیں پہ رہے
عمر سب آسمان میں گزری
اپنا رشتہ زمیں سے ہی رکھو
کچھ نہیں آسمان میں رکھا

جگر مراد آبادی

تو جہاں ناز سے قدم رکھ دے
وہ زمین آسمان ہے پیارے

قمر جلالوی

دیکھ کر مجھ کو اتر آئے قمر وہ بام سے
دیکھنے پائیں نہ سیر آسمان اچھی طرح

شکیب جلالی

جزا کہیں کہ سزا‘ اس کو بال و پر والے
زمیں سکڑتی گئی‘ جتنا آسمان کھلا
ہم جنس اگر ملے نہ کوئی آسمان پر
بہتر ہے خاک ڈالیے ایسی اڑان پر
یارو! میں اس نظر کی بلندی کو کیا کروں
سایہ بھی اپنا دیکھتا ہوں آسمان پر
سایہ نہیں تھا نیند کا آنکھوں میں دور تک
بکھرے تھے روشنی کے نگیں آسمان پر
چاند جس آسمان میں ڈوبا
کب اسی آسمان سے نکلا

عرفان صدیقی

ابھی ابھی جو ستارے مرے کنار میں تھے
چمک رہے ہیں سرِ آسمانِ گمشدگاں
زندگی ہے تو دشمنان عزیز
پھر تہہ آسمان ملتے ہیں
ہر جگہ ایک دوسرے کے حریف
بیکراں آسمان بھی، ہم بھی
جدھر بھی جاؤ وہی فاصلوں کی دیواریں
کوئی زمیں ہو وہی آسمان بیچ میں ہے

جمال احسانی

جمالؔ ہر شہر سے ہے پیارا وہ شہر مجھ کو
جہاں سے دیکھا تھا پہلی بار آسمان میں نے
جو پہلے روز سے دو آنگنوں میں تھا حائل
وہ فاصلہ تو زمین آسمان میں بھی نہ تھا
پھر آج اک ستارہ جاگتا رہا
پھر آج سات آسمان سو گئے

بشیر بدر

چمک رہی ہے پروں میں اڑان کی خوشبو
بلا رہی ہے بہت آسمان کی خوشبو