مرزا غالب

عشق و مزدوریِ عشرت گہِ خسرو، کیا خوب!
ہم کو تسلیم نکو نامی فرہاد نہیں

داغ دہلوی

بستیوں سے یہی آواز چلی آتی ہے
جو کیا تو نے وہ آگے ترے فرہاد آیا
باقی جہاں میں قیس نہ فرہاد رہ گیا
افسانہ عاشقوں کا فقط یاد رہ گیا

مصطفٰی خان شیفتہ

غمزۂِ شیریں ہی کی دولت سے تھا
جو اثر تھا تیشۂِ فرہاد میں

مومن خان مومن

شوخ بازاری تھی شیریں بھی مگر
ورنہ فرق خسرو و فرہاد کیا
ناکامیوں میں تم نے جو تشبیہ مجھ سے دی
شیریں کو درد تلخی فرہاد آ گیا

فیض احمد فیض

پہلے بھی طواف شمعِ وفا تھی، رسمِ محبت والوں کی
ہم تم سے پہلے بھی یہاں منصور ہوئے ، فرہاد ہوئے

مرزا رفیع سودا

پتھر کی لیکھ تھا سخن اس کا ہزار حیف
بولی زبان تیشہ نہ فرہاد کی طرف

یگانہ چنگیزی

سرِ شوریدہ سلامت ہے مگر کیا کہیے
دست فرہاد نہیں تیشۂ فرہاد نہیں

جون ایلیا

نام وری کی بات دگر ہے ورنہ یارو سوچو تو
گلگوں اب تک کتنے تیشے بے خون فرہاد ہوئے
پھر گوارا ہے مجھے عشق کی ہر اک مشکل
تازہ پھر شیوۂ فرہاد کیا ہے میں نے
مبارک فال نیک اے خسرو شہر
مجھے فرہاد فرمایا گیا ہے
بے ستوں اک نواحی میں ہے شہرِ دل کی
تیشہ انعام کریں اور کوئی فرہاد رکھیں

قمر جلالوی

ہم خیالِ قیس ہوں ہم مشربِ فرہاد ہوں
حسن اتنا سوچ لے دو بیکسوں کی یاد ہوں