شکیب جلالی

جل تھل ہوئی تمام زمیں آس پاس کی
پانی کی بوند بھی نہ گری سائبان پر

عرفان صدیقی

یہ لگن تھی خاک اڑائیے ، کبھی بارشوں میں نہائیے
وہ ہوا چلی وہ گھٹا اٹھی تو میں سائبان میں آ گیا
ایک ہی دھوپ کی حفاظت میں
دشت بھی، سائبان بھی، ہم بھی
رتوں کے جسم سے کیسے لپٹ سکوں عرفانؔ
مرا بدن ہے کہ اک سائبان بیچ میں ہے

جمال احسانی

میں دھوپ میں کیوں کسی کا احسان مند ہوتا
خود اپنے سائے کو کر لیا سائبان میں نے
اس آنکھ کی پناہ اب نہیں نصیب
پلک پلک وہ سائبان سو گئے

رئیس فروغؔ

تری بہار کا شجر ہرا بھرا رہے مگر
وہ ڈالیاں بھی کھول دے جو میرا سائبان ہیں

رسا چغتائی

جانتا ہوں زمین کس کی ہے
بیٹھ جاتا ہوں سائبان سے دور
کیا عجب شخص ہے کہ بیٹھا ہے
دھوپ میں سائبان کے آگے