مرزا غالب

دشنے نے کبھی منہ نہ لگایا ہو جگر کو
خنجر نے کبھی بات نہ پوچھی ہو گلو کی

حیدر علی آتش

دامن مرے قاتل کا نہ رنگیں ہو لہو سے
ہرچند کہ نزدیک ہو رگ ہائے گلو سے
چمن میں جا کے بھولے سے میں خستہِ دل کراہا تھا
کیا کی گل سے بلبل شکوۂِ درد گلو برسوں
دیوان حسن میں سے ہوئی ہے یہ انتخاب
عاشق مزاج سیر بیاض گلو کریں
بیاض گردن جاناں کو صبح کہتے جو ہم
ستارۂ سحری تکمۂِ گلو کرتے

شیخ ابراہیم ذوق

دیکھ کر سرمے کی تحریر تری آنکھوں میں
کافروں کے بھی ہیں زنار گلو ٹوٹ گئے
تیر دل سے وہ نکلتے ہیں کوئی جذبۂِ شوق
نکلے سوفار جو سینے سے گلو ٹوٹ گئے

مصحفی غلام ہمدانی

بانگ ذبیح ہو نہ کبھی آشنائے گوش
کیوں کر ترے شہید فغاں بے گلو کریں
قربانیان الفت سب سر کٹے پڑے ہیں
شمشیر کے حوالے کس کا گلو نہیں یاں
مر گئی سرو پہ جب ہو کے تصدق قمری
اس سے اس دم بھی نہ طوق اپنے گلو کا نکلا

مصطفٰیٰ خان شیفتہ

دی کس نے اشکِ سرمہ سے تیغِ مژہ کو آب
شورِ فغاں کو فکرِ خراشِ گلو نہیں

قمر جلالوی

یہ بلبل جس کی آوازیں خزاں میں اتنی دلکش ہیں
بہاروں میں خدا معلوم کتنی خوش گلو ہو گی
یں سخت جاں کہ قاتل کا ہاتھ نازک ہے
یہ کل کو فیصلہ خود خنجر و گلو کرتے

عرفان صدیقی

پھر اک عجیب تماشا رہے گا صدیوں تک
یہ کارزارِ کمان و گلو ہے کتنی دیر

رئیس فروغؔ

جنہیں روٹھے ہوئے دلدار کی بانہیں سمجھتے ہو
وہ شاخیں کاٹ لانا پھر انہیں زیبِ گلو کرنا

بیان میرٹھی

اسے کہتے ہیں قمری طوق الفت
چھری لپٹی ہوئی ہے یاں گلو سے

عالم تاب تشنہ

حصار مقتلِ جاں میں لہو لہو میں تھا
رسن رسن مری وحشت گلو گلو میں تھا

علی سردار جعفری

بہ حکم کیجیے پھر خنجروں کی دل داری
دہانِ زخم سے افسانۂ گلو کہیے

حسرت موہانی

تری تلوار سے اے شاہِ خوباں
محبت ہو گئی ہے ہر گلو کو

خاطر غزنوی

خشک آنکھوں کے جزیروں میں بگولوں کا غبار
دھڑکنوں کا شور سرمہ در گلو میں اور تو

اکبر حمیدی

جو وقت اہل وفا سے کبھی لہو مانگے
تو سب سے پہلے لب تیغ پر گلو رکھنا

احمد فراز

دستِ قاتل سے کچھ امیدِ شفا تھی لیکن
نوکِ خنجر سے بھی کانٹا نہ گلو کا نکلا

محسن نقوی

جلوس اہلِ وفا کس کے در پہ پہنچا ہے
نشان‌ طوق وفا زینت گلو کر کے