مرزا غالب

نقل کرتا ہوں اسے نامۂِ اعمال میں میں
کچھ نہ کچھ روزِ ازل تم نے لکھا ہے تو سہی

مصطفٰی خان شیفتہ

وہ بے پروا جوابِ نامہ لکھے
خدا جانے کہ دشمن نے لکھا کیا

مرزا رفیع سودا

سادہ روئی نے تو کھویا دل و دیں سے دیکھیں
خط کے آنے میں ہے قسمت کا لکھا کیا کیا کچھ

جون ایلیا

وہ منکر ہے تو پھر شاید ہر اک مکتوب شوق اس نے
سر انگشتِ حنائی سے خلاؤں میں لکھا ہو گا
میں تو اب شہر میں کہیں بھی نہیں
کیا مرا نام بھی لکھا ہے کہیں

شکیب جلالی

میں ساحلوں میں اترا کر شکیبؔ کیا لیتا
ازل سے نام مرا پانیوں پہ لکھا تھا
اے دوست! چشمِ شوق نے دیکھا ہے بارہا
بجلی سے تیرا نام گھٹا پر لکھا ہوا

عرفان صدیقی

تھا بہت کچھ جو کوئی دیکھنے والا ہوتا
یوں کسی شخص کے چہرے پہ لکھا کچھ بھی نہ تھا
میں تو چپ تھا پھر زمانے کو خبر کیسے ہوئی
میرے چہرے پر لکھا ہو گا علیؑ آنے کو ہیں
ہم تو بارش ہیں خرابے کی ہمیں اگلے برس
در و دیوار کے چہرے پہ لکھا ہونا ہے

الطاف حسین حالی

غیر ممکن ہے نہ ہو تاثیر غم
حالِ دل پھر اس کو لکھا چاہیے

ادا جعفری

خونِ دل میں تو ڈبویا تھا قلم
اور پھر کچھ نہ لکھا تھا شاید

بشیر بدر

جس پر ہماری آنکھ نے موتی بچھائے رات بھر
بھیجا وہی کاغذ اسے ہم نے لکھا کچھ بھی نہیں
جسے لے گئی ہے ابھی ہوا وہ ورق تھا دل کی کتاب کا
کہیں آنسوؤں سے مٹا ہوا کہیں آنسوؤں سے لکھا ہوا
برسات میں دیوار و در کی ساری تحریریں مٹیں
دھویا بہت مٹتا نہیں تقدیر کا لکھا ہوا
مجھے ان نیلی آنکھوں نے بتایا
تمہارا نام پانی پر لکھا ہے
وہ خط پاگل ہوا کے آنچلوں پر
کسے تم نے لکھا تھا یاد ہوگا
ہاتھ میں چاند جہاں آیا مقدر چمکا
سب بدل جائے گا قسمت کا لکھا جام اٹھا

سدرشن فاکر

دل کے دیوار و در پہ کیا دیکھا
بس ترا نام ہی لکھا دیکھا

عبید اللہ علیم

وہ کون سا ہاتھ ہے کہ جس نے
مجھ آگ کو خاک سے لکھا ہے

رسا چغتائی

سنا ہے ڈوبنے والے نے پہلے
کسی کا نام ساحل پر لکھا ہے
لہو میں میرے گردش کر رہا ہے
ابھی وہ حرف جو لکھا نہیں ہے

اختر ہوشیارپوری

کیا کہوں دست ہوا کے شعبدے
ریت پر اک نام تھا لکھا ہوا

افضل منہاس

گم صم ہوا کے پیڑ سے لپٹا ہوا ہوں میں
کتبے پہ اپنے ہاتھ سے لکھا ہوا ہوں میں

محسن نقوی

اک اجنبی جھونکے نے جب پوچھا مرے غم کا سبب
صحرا کی بھیگی ریت پر میں نے لکھا آوارگی

ناصر کاظمی

کس دنیا کی کوتا ہے یہ
کن ہاتھوں نے اسے لکھا تھا
وہی ہوئی ہے جو ہونی تھی
وہی ملا ہے جو لکھا تھا
میں نے جب لکھنا سیکھا تھا
پہلے تیرا نام لکھا تھا