مرزا غالب

نکتہ چیں ہے ، غمِ دل اس کو سنائے نہ بنے
کیا بنے بات ، جہاں بات بنائے نہ بنے

داغ دہلوی

رہے چپ نہ ہم بھی دم عرض مطلب
وہ اک اک کی سو سو سنائے گئے ہیں

باقی صدیقی

بہت واقعے پیش آئے تھے لیکن
نہ تم نے سنے کچھ نہ ہم نے سنائے

جگر مراد آبادی

نغمہ وہی ہے نغمہ کہ جس کو
روح سنے اور روح سنائے
سنائے تھے لب نے سے کسی نے جو نغمے
لب جگرؔ سے مکرر سنائے جاتے ہیں

قمر جلالوی

تیور چڑھا کے پوچھ رہے ہیں وہ حالِ دل
رودادِ غم تو یاد ہے لیکن سنائے کون
ہم آج کہہ رہے ہیں یہاں داستانِ قیس
کل دیکھئے ہمارا فسانہ سنائے کون

عرفان صدیقی

سخن سرا ہے تو مجھ سے مکالمہ بھی کرے
گلہ سنے بھی اور اپنی غزل سنائے بھی

رئیس فروغؔ

گیت کے بعد بھی گائے جاؤں
اپنی آواز سنائے جاؤں

آنس معین

انجام کو پہنچوں گا میں انجام سے پہلے
خود میری کہانی بھی سنائے گا کوئی اور

بشیر بدر

آہن میں ڈھلتی جائے گی اکیسویں صدی
پھر بھی غزل سنائے گی اکیسویں صدی

عبید اللہ علیم

اہلِ دل ہوں گے تو سمجھیں گے سخن کو میرے
بزم میں آ ہی گیا ہوں تو سنائے جاؤں

حفیظ جالندھری

اخبار سے مری خبر مرگ اے حفیظؔ
میرا ہی دوست پڑھ کے سنائے تو کیا کروں

فراق گورکھپوری

پیام حسن پیام جنوں پیام فنا
تری نگہ نے فسانے سنائے ہیں کیا کیا

ناصر کاظمی

اس پیکرِ ناز کا فسانہ
دل ہوش میں آئے تو سنائے
حال کس سے کہوں کہ ہر کوئی
اپنی اپنی سنائے جاتا ہے