مرزا غالب

اس نزاکت کا برا ہو ، وہ بھلے ہیں ، تو کیا
ہاتھ آویں ، تو انہیں ہاتھ لگائے نہ بنے

داغ دہلوی

شبِ وصل بھی لب پہ آئے گئے ہیں
یہ نالے بہت منہ لگائے گئے ہیں
نگہ کو جگر زلف کو دل دیا ہے
یہ دونوں ٹھکانے لگائے گئے ہیں

مصحفی غلام ہمدانی

تیرے کوچے سے آئے جو ان کے
اپنی آنکھوں سے میں لگائے قدم

میر مہدی مجروح

وہ نہیں ہیں تو درد کو ان کے
سینے سے ہم لگائے بیٹھے ہیں
رنگ جمتا ہے یاں نہ آنے کا
یعنی مہندی لگائے بیٹھے ہیں
زد میں گر ہے عدو تو ہو وہ تو
گھات مجھ پر لگائے بیٹھے ہیں
شمع ساں گو گھلے ہی جاتے ہیں
اس سے پر لو لگائے بیٹھے ہیں

باقی صدیقی

ان کی بات پہ جائے کون
جھوٹی آس لگائے کون

جگر مراد آبادی

ضد پر عشق اگر آ جائے
پانی چھڑکے آگ لگائے

قمر جلالوی

مٹی مریضِ غم کی ٹھکانے لگائے کون
دنیا تو ان کے ساتھ ہے میت اٹھائے کون

رئیس فروغؔ

دھوپ نے اور جلایا تو فروغؔ
اور کچھ پیڑ لگائے میں نے
کوئی چاندنی تھی کسی رستے میں
مرے سائے سے آس لگائے ہوئے

اسرار الحق مجاز

تیرے گناہ گار گناہ گار ہی سہی
تیرے کرم کی آس لگائے ہوئے تو ہیں

آنس معین

اس بار ہوں دشمن کی رسائی سے بہت دور
اس بار مگر زخم لگائے گا کوئی اور

بشیر بدر

میں چاہتا ہوں کہ تم ہی مجھے اجازت دو
تمہاری طرح سے کوئی گلے لگائے مجھے

عبید اللہ علیم

اب تو اس کی ہوئی جس پہ مجھے پیار آتا ہے
زندگی آ تجھے سینے سے لگائے جاؤں

علی سردار جعفری

ظلم اور جبر کے احکام سے خاموش مگر
مہر پیمان محبت کی لگائے ہوئے ہونٹ

جوش ملیح آبادی

ہاں کس کو جستجو ہے نسیم فراغ کی
آسودگی کو آگ لگائے ہوئے ہیں ہم

سیماب اکبر آبادی

لگاؤ ہے مری تنہائیوں سے فطرت کو
تمام رات ستارے لگائے جاتے ہیں

شکیل بدایونی

تیرے حضور تجھ سے خفا ہو کے جائے کون
زخم دلِ تباہ پہ نشتر لگائے کون
اف رے ستم شکیلؔ یہ حالت تو ہو گئی
اب بھی کرم کی آس لگائے ہوئے ہو تم

فانی بدایونی

بلائے جاں ہے مگر پھر بھی آرزو ہے تری
ہم اس کو اپنے کلیجے سے ہیں لگائے ہوئے
اجل کو مژدۂ فرصت کہ آج فانیؔ زار
امید وصل سے بیٹھا ہے لو لگائے ہوئے

افضل منہاس

دکھا رہی ہے نئی زندگی کے نقشِ قدم
سکوں کی نیند گلے سے مجھے لگائے ہوئے

قتیل شفائی

وہی تو سب سے زیادہ ہے نکتہ چیں میرا
جو مسکرا کے ہمیشہ گلے لگائے مجھے

کیفی اعظمی

لیلیٰ نے نیا جنم لیا ہے
ہے قیس کوئی جو دل لگائے

مجروح سلطان پوری

غیروں کی خلش اپنوں کی لگن سوزِ غمِ جاناں درد وطن
کیا کہیے کہ ہم ہیں کس کس کو سینے سے لگائے زنداں میں
جسموں پہ یہ کس کا نام سیہ لکھ دیتے ہیں کوڑوں کے نشاں
ہیں تاک میں کس کی زنجیریں اب آنکھ لگائے زنداں میں