مرزا غالب

رہی نہ طاقتِ گفتار اور اگر ہو بھی
تو کس امید پہ کہیے کہ آرزو کیا ہے

حیدر علی آتش

ہوا مہمان آ کر رات بھر وہ شمعِ رو برسوں
رہا روشن مرے گھر کا چراغِ آرزو برسوں
برابر جان کے رکھا ہے اس کو مرتے مرتے تک
ہماری قبر پر رویا کرے گی آرزو برسوں
دیدار عام کیجیے پردہ اٹھائیے
تا چند بندہ ہائے خدا آرزو کریں
آتشؔ یہ وہ زمیں ہے کہ جس میں بقول دردؔ
دل ہی نہیں رہا ہے جو کچھ آرزو کریں
پیامبر نہ میسر ہوا تو خوب ہوا
زبانِ غیر سے کیا شرح آرزو کرتے
جو دیکھتے تری زنجیر زلف کا عالم
اسیر ہونے کی آزاد آرزو کرتے
نہ پوچھ عالم برگشتہ طالعی آتشؔ
برستی آگ جو باراں کی آرزو کرتے

داغ دہلوی

رقیبوں کو تمنا ہے تو باشد
تمہیں مطلب پرائی آرزو سے
عدو بھی تم کو چاہے اے تری شان
لڑاتے ہیں ہم اپنی آرزو سے
کیا لطف انتظار جو تو حیلہ جو نہ ہو
کس کام کا وصال اگر آرزو نہ ہو
معشوق ہجر اس سے زیادہ کوئی نہیں
کیا دل لگی رہے جو تری آرزو نہ ہو
ہے لاگ کا مزا دلِ بے مدعا کے ساتھ
تم کیا کرو کسی کو اگر آرزو نہ ہو
اے داغؔ آ کے پھر گئے وہ اس کو کیا کریں
پوری جو نا مراد تری آرزو نہ ہو
نا امیدی بڑھ گئی ہے اس قدر
آرزو کی آرزو ہونے لگی

شیخ ابراہیم ذوق

مزہ تھا ہم کو جو لیلیٰ سے دو بہ دو کرتے
کہ گل تمہاری بہاروں میں آرزو کرتے
چمن بھی دیکھتے گلزار آرزو کی بہار
تمہاری بادِ بہاری میں آرزو کرتے
مزے جو موت کے عاشق بیاں کبھو کرتے
مسیح و خضر بھی مرنے کی آرزو کرتے
مرے سینے سے تیرا تیر جب اے جنگجو نکلا
دہانِ زخم سے خوں ہو کے حرفِ آرزو نکلا

مصحفی غلام ہمدانی

جو آرزو دلوں میں مضمر ہے صاحبوں کے
ہے آرزو تو لیکن وہ آرزو نہیں یاں

مصطفٰی خان شیفتہ

کچھ اور بے دلی کے سوا آرزو نہیں
اے دل یقین جان کہ ہم ہیں تو تو نہیں
واں بار ہو گیا ہے نزاکت سے بار بھی
یاں ضعف سے دماغ و دلِ آرزو نہیں
بد خوئیوں سے یار کی کیا خوش ہوں شیفتہ
ہر ایک کو جو حوصلۂِ آرزو نہیں