مرزا غالب

غم کھانے میں بودا دلِ ناکام بہت ہے
یہ رنج کہ کم ہے مئے گلفام، بہت ہے

حیدر علی آتش

آئنہ خانہ کریں گے دلِ ناکام کو ہم
پھیریں گے اپنی طرف روئے دل آرام کو ہم
قطرۂِ اشک میں سرخی کا کہیں نام نہیں
لہو تیرا بھی ہوا اے دلِ ناکام سفید

مومن خان مومن

گر غیر کے گھر سے نہ دل آرام نکلتا
دم کاہے کو یوں اے دلِ ناکام نکلتا

فیض احمد فیض

کرتے ہیں جس پہ طعن کوئی جرم تو نہیں
شوقِ فضول و الفتِ ناکام ہی تو ہے
دل ناامید تو نہیں، ناکام ہی تو ہے
لبمی ہے غم کی شام مگر شام ہی تو ہے

جگر مراد آبادی

یارب یہ مقام عشق ہے کیا گو دیدہ و دلِ ناکام نہیں
تسکین ہے اور تسکین نہیں آرام ہے اور آرام نہیں

عبدالحمید عدم

بھولے سے کبھی لے جو کوئی نام ہمارا
مر جائے خوشی سے دلِ ناکام ہمارا

مجید امجد

اب ان بھولے ہوئے قصوں کو دہرانے سے کیا حاصل
یہ اب کیا آپ لے بیٹھے دلِ ناکام کے شکوے

احسان دانش

حوصلے مایوس ذوق جستجو ناکام ہے
یہ دل‌ نا محرم انجام کا انجام ہے

ادا جعفری

تھک ہار کے بیٹھے ہیں سرِ کوئے تمنا
کام آئے تو پھر جذبۂ ناکام ہی آئے

اسرار الحق مجاز

نگاہِ لطف مت اٹھ خوگر آلام رہنے دے
ہمیں ناکام رہنا ہے ہمیں ناکام رہنے دے

تلوک چند محروم

بدنام ہوں پر عاشق بدنام تمہارا
ناکام ہوں پر طالب ناکام تمہارا

شاد عظیم آبادی

لگی ہو کچھ تو قاصد آخر اس کم بخت دل میں بھی
وہاں تیری طرح جو جائے گا ناکام آئے گا
وہی رہ رہ کے گھبرانا وہی نا کار گر آہیں
سوا اس بات کے تجھ سے دلِ ناکام کیا ہو گا
باتوں میں گزرتے ہجر کے دن اے کاش کہ دونوں مل جاتے
ہم سے ہے دلِ ناکام خفا آزردہ دلِ ناکام سے ہم

شکیل بدایونی

جب ہوا ذکر زمانے میں محبت کا شکیلؔ
مجھ کو اپنے دلِ ناکام پہ رونا آیا
عشق میں آئیں گی وہ بھی ساعتیں
کام نکلے گا دلِ ناکام سے

فانی بدایونی

کیا عمر میں اک آہ بھی بخشی نہیں جاتی
اک سانس بھی کیا آپ کے ناکام نہ لیتے

فراق گورکھپوری

روح لرزاں آنکھ محوِ دید دلِ ناکام تھا
عشق کا آغاز بھی شائستۂ انجام تھا
رونق بزمِ جہاں تھا گو دل غمگیں فراقؔ
سرد تھا افسردہ تھا محروم تھا ناکام تھا

قتیل شفائی

تڑپتی ہیں تمنائیں کسی آرام سے پہلے
لٹا ہو گا نہ یوں کوئی دلِ ناکام سے پہلے
گرمی حسرت ناکام سے جل جاتے ہیں
ہم چراغوں کی طرح شام سے جل جاتے ہیں