مرزا غالب

جوش جنوں سے کچھ نظر آتا نہیں، اسدؔ
صحرا ہماری آنکھ میں یک مشتِ خاک ہے
کرنے گئے تھے اس سے تغافل کا ہم گلہ
کی ایک ہی نگاہ کہ بس خاک ہو گئے

مصحفی غلام ہمدانی

ٹکڑا جہاں گرا جگرِ چاک چاک کا
یاقوت سا دمکنے لگا رنگ خاک کا
سوتے ہیں ہم زمیں پر کیا خاک زندگی ہے
ماٹی میں سن رہے ہیں ناپاک زندگی ہے

عرفان صدیقی

اے فکرِ سخن کیوں زرِ گل خاک سے لے آؤں
مضمون اگر کم ہوں تو افلاک سے لے آؤں

جمال احسانی

ہونے کی گواہی کے لیے خاک بہت ہے
یا کچھ بھی نہیں ہونے کا ادراک بہت ہے
دن گزرتے جا رہے ہیں اور ہجوم خوش گماں
منتظر بیٹھا ہے آب و خاک سے بچھڑا ہوا
اک ستارہ مجھ سے مل کر رو پڑا تھا کل جمالؔ
وہ فلک سے اور میں تھا خاک سے بچھڑا ہوا
وہ بھی ملنے نئی پوشاک بدل کر آیا
میں جو کل پیرہنِ خاک بدل کر آیا

اکبر معصوم

یہ گل جس خاک سے لایا گیا ہے
اسے افلاک سے لایا گیا ہے
اجالا ہے جو یہ کون و مکاں میں
ہماری خاک سے لایا گیا ہے

ضیا جالندھری

کیوں ٹھہرتا نہیں گلزار میں کوئی موسم
کیا کشش رکھتی ہے خوشبوئے ‌ تہہ خاک نہ کہہ

ظہیر کاشمیری

برق زمانہ دور تھی لیکن مشعل خانہ دور نہ تھی
ہم تو ظہیرؔ اپنے ہی گھر کی آگ میں جل کر خاک ہوئے