مرزا غالب

نباتات زمیں سے کیا ان کو نسبت؟ معاذاللہ
اسے برق اور اسے ہم کالی ساون کی گھٹا سمجھے

باقی صدیقی

ایسے موسم کی انتہا معلوم
دل برسنے لگا گھٹا کے ساتھ

جون ایلیا

کیا ہمارا نہیں رہا ساون
زلف یاں بھی کوئی گھٹا بھیجو

شکیب جلالی

خوددار ہوں ‘ کیوں آؤں در اہلِ کرم پر
کھیتی کبھی خود چل کے گھٹا تک نہیں آتی

عرفان صدیقی

یہ کون سے صحرا کی پراسرار ہوا تھی
پل بھر میں نہ دریا تھا نہ میں تھا نہ گھٹا تھی
مرے وجود کا جنگل ہرا بھرا ہو جائے
وہ رت بھی آئے کہ اس کا بدن گھٹا ہو جائے
کوئی کونپل نہیں اس ریت کی تہ میں تو کیا نکلے
یہاں اے سادہ دل کالی گھٹا سے کچھ نہیں ہوتا
میری مٹی میں بھی کچھ پودے نمو آمادہ ہیں
تو مرے آنگن تک اے کالی گھٹا کب آئے گی
کوئی بجلی ان خرابوں میں گھٹا روشن کرے
اے اندھیری بستیو! تم کو خدا روشن کرے
زمیں پر بھی سبزے کی تحریر لکھ دے
سمندر پہ کالی گھٹا لکھنے والے
کیجے نہ ریگ زار میں پھولوں کا انتظار
مٹی ہے اصل چیز، گھٹا پر نہ جائیے

رئیس فروغؔ

یہی خیال کہ برسے تو خود برس جائے
سو عمر بھر کسی کالی گھٹا سے کچھ نہ کہا

اختر شیرانی

بہار آئی ہے مستانہ گھٹا کچھ اور کہتی ہے
مگر ان شوخ نظروں کی حیا کچھ اور کہتی ہے
اس چشم سیہ مست پہ گیسو ہیں پریشاں
میخانے پہ گھنگور گھٹا کھیل رہی ہے

ادا جعفری

اب یہ اداس دن ہمیں ساتھ لیے لیے پھرے
خواب بجھے تو کیا رہا کالی گھٹا بھی کیوں کھلے
غیور دل سے نہ مانگی گئی مراد اداؔ
برسنے آپ ہی کالی گھٹا نہیں آئی

بشیر بدر

مان موسم کا کہا چھائی گھٹا جام اٹھا
آگ سے آگ بجھا پھول کھلا جام اٹھا

تلوک چند محروم

مانگتے ہی رہ گئے بیکس دعا برسات کی
آسماں تو نے نہ دکھلائی گھٹا برسات کی

حفیظ جالندھری

الٰہی تیرے کرم سے ملے مے و معشوق
اب التجا ہے برستی ہوئی گھٹا کے لیے

سید ضمیر جعفری

یہ کیا غم ہے مرے اشعار کو نم کر دیا کس نے
یہ دل میں کس سمندر کی گھٹا کو دیکھتا ہوں میں

شکیل بدایونی

زاہدوں کو کسی کا خوف نہیں
صرف کالی گھٹا سے ڈرتے ہیں

افضل منہاس

جا چکے سارے بگولے فکر کی کیا بات ہے
کھیت کو سیراب کرنے اب گھٹا بھی آئے گی

احمد فراز

یہی ہے قسمتِ صحرا، یہی کرم تیرا
کہ بوند بوند عطا کر، گھٹا گھٹا لے جا

اقبال ساجد

یہ الگ بات سمندر پہ وہ برسی ساجدؔ
اور کسی کھیت کو پیاسا نہ گھٹا نے رکھا

امیر مینائی

ہنس پڑے آپ، تو بجلی چمکی
بال کھولے ، تو گھٹا لوٹ گئی

شاذ تمکنت

نمیدہ خو ہے یہ مٹی ہر ایک موسم میں
زمین دل ہے ترستی نہیں گھٹا کے لیے
یہ ہوش ہے کہ گزر جائے گی پھوار کی رت
مگر یہ زعم کہ اودی گھٹا سے کچھ نہ کہا
کب لوٹ کے آؤ گے اصرار نہیں کرتا
اتنا مرے بس میں ہے میں عمر گھٹا لوں گا

قتیل شفائی

سزا گناہوں کی دینا اس کو ضرور لیکن
وہ آدمی ہے تم اس کی عظمت گھٹا نہ دینا
یارو یہ دور ضعف بصارت کا دور ہے
آندھی اٹھے تو اس کو گھٹا کہہ لیا کرو