لا ساقیا پیالہ کہ توبہ کا قل ہوا
شیخ ابراہیم ذوق
محفل میں شور قلقل مینائے مل ہوا
لا ساقیا پیالہ کہ توبہ کا قل ہوا
جن کی نظر چڑھا ترا رخسار آتشیں
ان کا چراغ گور نہ تا حشر گل ہوا
بندہ نوازیاں تو یہ دیکھو کہ آدمی
جزو ضعیف محرمِ اسرار کل ہوا
دریائے غم سے میرے گزرنے کے واسطے
تیغ خمیدہ یار کی لوہے کا پل ہوا
پروانہ بھی تھا گرم تپش پر کھلا نہ راز
بلبلِ کی تنگ حوصلگی تھی کہ غل ہوا
آئی تہی دروں کی نہ ہرگز سمجھ میں بات
آوازہ گو بلند مثال دہل ہوا
اس بن رہا چمن میں بھی میں ذوقؔ دل خراش
ناخن سے تیز تر مجھے ہر برگِ گل ہوا
مفعول فاعلات مفاعیل فاعِلن
مضارع مثمن اخرب مکفوف محذوف