امام بخش ناسخ

قامت موزوں نظر آئے مجھے جائے الف
تھا شروع عاشقی دن میری بسمِ اللہ کا
سمجھے میکش دیکھ کر ابرو تری بالائے چشم
مے کدے سے مرتبہ اعلیٰ ہے بیتُ اللہ کا

انشاء اللہ خان انشا

میں کیسے نباہتا ہوں تم سے
انشا اللہ دیکھئے گا

حیدر علی آتش

سبزہ بالائے ذقن دشمن ہے خلقِ اللہ کا
رہروؤں کی موت ہے خس پوش ہونا چاہ کا
صفحۂِ دل سے اٹھاؤں کس طرح نقش صنم
ملک میں ہوتا کسی کے گھر نہیں اللہ کا
دل کو ابروئے صنم کا شیفتہ کرتی ہے آنکھ
درس دیتا ہے معلم پہلے بسمِ اللہ کا
شعر کہتا ہوں میں اے آتشؔ خدا کی حمد میں
میری ہر اک بیت پر عالم ہے بیتُ اللہ کا
طاق ابرو ہیں پسند طبع اک دل خواہ کے
عمر ہوتی ہے بسر گنبد میں بسمِ اللہ کے
جاؤں کیوں کر بن بلائے اس بت دل خواہ کے
بے طلب کوئی نہیں پہونچا حضور اللہ کے
اس بتِ بے دیں کی زلفوں کا اشارہ ہے یہی
اس بلا میں وہ پھنسیں عاشق ہوں جو اللہ کے
زنار ڈالا تسبیح پھیکی
عشق صنم میں اللہ بھولا

مرزا رفیع سودا

برہمن بت کدے کے شیخ بیتُ اللہ کے صدقے
کہیں ہیں جس کو سوداؔ وہ دل آگاہ کے صدقے