امام بخش ناسخ

گنتی ایک اک نام کی ہر گور میں مردے ہیں دفن
بعد مردن بھی ہوئی دشوار تنہائی مجھے
ہے تصور مجھے ہر دم تری یکتائی کا
مشغلہ آٹھ پہر ہے یہی تنہائی کا

داغ دہلوی

اس قدر ناز ہے کیوں آپ کو یکتائی کا
دوسرا نام ہے وہ بھی مری تنہائی کا
جان لے جائے گا آنا شبِ تنہائی کا
کون اب روکنے والا ہے مری آئی کا
خوگر رنج و بلا حشر کے دن کیا خوش ہوں
کہ وہ مال آج ہوا ہے شبِ تنہائی کا
بن گیا داغِ جگر مہر قیامت اے داغؔ
پر ابھی رنگ وہی ہے شبِ تنہائی کا

مصحفی غلام ہمدانی

اس گوشۂ عزلت میں تنہائی ہے اور میں ہوں
معشوق تصور سے یکجائی ہے اور میں ہوں
شبِ ہجراں تھی میں تھا اور تنہائی کا عالم تھا
غرض اس شب عجب ہی بے سر و پائی کا عالم تھا

فیض احمد فیض

امیدِ تلطف میں‌ رنجیدہ رہے دونوں
تو اور تری محفل، میں اور مری تنہائی

جون ایلیا

تو بھی چپ ہے میں بھی چپ ہوں یہ کیسی تنہائی ہے
تیرے ساتھ تری یاد آئی کیا تو سچ مچ آئی ہے

قمر جلالوی

آپ نے محفلِ اغیار کی رونق تو کہی
مجھ سے کچھ حال نہ پوچھا شبِ تنہائی کا
شمع گل ہو گئی تارے بھی قمر ڈوب گئے
کوئی مونس نہ رہا اب شبِ تنہائی کا

الطاف حسین حالی

رنج اور رنج بھی تنہائی کا
وقت پہنچا مری رسوائی کا
عمر شاید نہ کرے آج وفا
کاٹنا ہے شبِ تنہائی کا
عمر شاید نہ کرے آج وفا
کاٹنا ہے شبِ تنہائی کا

رئیس فروغؔ

میں تو اس کا سناٹا ہوں
وہ میری تنہائی ہے

آنس معین

ہو جائے گی جب تم سے شناسائی ذرا اور
بڑھ جائے گی شاید مری تنہائی ذرا اور

زہرا نگاہ

جو دل نے کہی لب پہ کہاں آئی ہے دیکھو
اب محفل یاراں میں بھی تنہائی ہے دیکھو

عبید اللہ علیم

آؤ تم ہی کرو مسیحائی
اب بہلتی نہیں ہے تنہائی

احمد راہی

تری وفا تری مجبوریاں بجا لیکن
یہ سوزش غم ہجراں یہ سرد تنہائی

حفیظ ہوشیارپوری

وہی میں ہوں وہی ہے تیرے غم کی کار فرمائی
کبھی تنہائی میں محفل کبھی محفل میں تنہائی
نہ چھوڑا دامن ہوش و خرد دل نے محبت میں
سزائے دل حصار آ گہی کی قیدِ تنہائی

خاطر غزنوی

پاس رہ کر مجھے یوں قرب کا احساس نہ تھا
دور رہ کر غم تنہائی نہیں تھا اتنا

سیف الدین سیف

ایک اداسی دل پر چھائی رہتی ہے
میرے کمرے میں تنہائی رہتی ہے

شبلی نعمانی

پوچھتے کیا ہو جو حال شبِ تنہائی تھا
رخصت صبر تھی یا ترک شکیبائی تھا
شبِ فرقت میں دل غمزدہ بھی پاس نہ تھا
وہ بھی کیا رات تھی کیا عالمِ تنہائی تھا
خوب وقت آئے نکیرین جزا دے گا خدا
لحد تیرہ میں بھی کیا عالمِ تنہائی تھا

شکیل بدایونی

مختصر ایک تو ویسے ہی نہ تھی قیدِ حیات
اور میعاد بڑھا دی شبِ تنہائی نے

فانی بدایونی

نام بدنام ہے ناحق شبِ تنہائی کا
وہ بھی اک رخ ہے تری انجمن آرائی کا

افضل منہاس

چپ رہے تو شہر کی ہنگامہ آرائی ملی
اب اگر کھولے تو ہم کو قیدِ تنہائی ملی

احمد فراز

جس کی ایما پہ کیا ترکِ تعلق سب سے
اب وہی شخص مجھے طعنۂ تنہائی دے

اقبال ساجد

وہ مسلسل چپ ہے تیرے سامنے تنہائی میں
سوچتا کیا ہے اتر جا بات کی گہرائی میں
بے لباسی ہی نہ بن جائے کہیں تیرا لباس
آئینے کے سامنے پاگل نہ ہو تنہائی میں

شاذ تمکنت

جس طرف جاؤں ادھر عالمِ تنہائی ہے
جتنا چاہا تھا تجھے اتنی سزا پائی ہے
تیرا لہجہ ہے کہ سناٹے نے آنکھیں کھولیں
تیری آواز کلید در تنہائی ہے

قتیل شفائی

انگڑائی پر انگڑائی لیتی ہے رات جدائی کی
تم کیا سمجھو تم کیا جانو بات مری تنہائی کی
اب چھوڑ ساتھ میرا اے یاد نوجوانی
اس عمر کا مسافر تنہائی چاہتا ہے
پایا نہ جب کسی میں بھی آوارگی کا شوق
صحرا سمٹ کے گوشۂ تنہائی بن گیا
گھبرائی کیوں بیٹھی ہے اب غم خواروں کے نرغے میں
لے آئی ہے محفل میں جب تو اپنی تنہائی کو
ہم ان کی بزم تک جا ہی پہنچتے ہیں کسی صورت
اگرچہ راہ میں دیوار تنہائی بھی ہوتی ہے

محسن احسان

سر دہلیز پریشان و سراسیمہ ہوں
در مقفل ہوا مجھ پر مری تنہائی کا
چار جانب سے صدا آئی مری
شعبدہ بن گئی تنہائی مری
رات پھیلی تو سر خلوتِ غم
بے کراں بن گئی تنہائی مری

محسن نقوی

آپ کی آنکھ سے گہرا ہے مری روح کا زخم
آپ کیا سوچ سکیں گے مری تنہائی کو

ناصر کاظمی

ترے خیال سے لو دے اٹھی ہے تنہائی
شبِ فراق ہے یا تیری جلوہ آرائی
یوں تو ہر شخص اکیلا ہے بھری دنیا میں
پھر بھی ہر دل کے مقدر میں نہیں تنہائی