امام بخش ناسخ

قصر تن کو یوں ہی بنوا یہ بگولے ناسخؔ
خوب ہی نقشۂِ تعمیر لیے پھرتے ہیں

بہادر شاہ ظفر

نازاں نہ ہو منعم کہ جہاں تیرا محل ہے
ہووے گی یہاں پہلے بھی تعمیر کسی کی
دیکھ دل کو مرے او کافر بے پیر نہ توڑ
گھر ہے اللہ کا یہ اس کی تو تعمیر نہ توڑ

مصحفی غلام ہمدانی

بعد مردن کی بھی تدبیر کیے جاتا ہوں
اپنی قبر آپ ہی تعمیر کیے جاتا ہوں
سینہ پہ سینہ خشت پہ گویا کہ خشت ہے
اب اے فلک نظارۂِ تعمیر وصل کر
ہوتی ہے عاشق و معشوق کی جس میں تصویر
اپنی آنکھوں میں وہ تعمیر بھلی لگتی ہے

مرزا رفیع سودا

دل کی شکست و ریخت کی میرے تو لے خبر
ہر گھر کی دیر پائی کو تعمیر شرط ہے

باقی صدیقی

سنگِ بنیاد ہیں ہم اس گھر کا
جو کسی طرح نہ تعمیر ہوا

عبدالحمید عدم

تباہ ہو کے حقائق کے کھردرے پن سے
تصورات کی تعمیر کر رہا ہوں میں

عبید اللہ علیم

بنیاد بھی میری در و دیوار بھی میرے
تعمیر ہوا میں کہ یہ تعمیر ہوئے سب

خاطر غزنوی

عمارت جسم کی مسمار ہوتی جا رہی ہر نفس لیکن
دلِ ویراں کو زعم رفعت تعمیر تھا کل شب جہاں میں تھا

شان الحق حقی

اہلِ ہمت کے مٹانے سے تو فارغ ہو لے
دہر کو فرصت تعمیر کہاں سے آئی

اختر ہوشیارپوری

میرے شانوں پہ فرشتوں کا بھی ہے بار گراں
اور مرے سامنے اک ملبے کی تعمیر بھی ہے
سر دیوار نوشتے بھی کئی دیکھتا ہوں
پس دیوار مگر حسرت تعمیر بھی ہے

احمد فراز

اگرچہ جسم کی دیوار گرنے والی ہے
یہ سادہ لوح کی تعمیر گھر کی دیکھتے ہیں

قتیل شفائی

پھر باندھ لی کسی سے امیدِ وفا قتیلؔ
پھر اک محل ہواؤں میں تعمیر ہو گیا

کیف بھوپالی

شہرِ محبت کا یوں اجڑا
دور تلک تعمیر نہیں ہے

محسن احسان

سو بار جو اندر سے میں ٹوٹا ہوں تو اک بار
باہر سے نظر آیا کہ تعمیر ہوا میں