انشاء اللہ خان انشا

نشان آہ لیے چھاؤں چھانو تاروں کے
چلے گی فوج سرشک آج چاندنی نکلے

داغ دہلوی

شبِ فراق جو کھولے ہیں ہم نے زخمِ جگر
یہ انتظار ہے کب چاندنی نکلتی ہے

جون ایلیا

صحن خیالِ یار میں کی نہ بسر شبِ فراق
جب سے وہ چاندنا گیا جب سے وہ چاندنی گئی
اس کے جمال کا تھا دن میرا وجود اور پھر
صبح سے دھوپ بھی گئی رات سے چاندنی گئی
یاد کی دھوپ تو ہے روز کی بات
ہاں مجھے چاندنی سے خطرہ ہے

عبدالحمید عدم

مے کدہ تھا چاندنی تھی میں نہ تھا
اک مجسم بے خودی تھی میں نہ تھا

قمر جلالوی

دیکھیں قمر کچھ افشاں اس مہ جبیں کے رخ پر
کتنے حسین تارے ہوتے ہیں چاندنی میں
اگر آ جائے پہلو میں قمر وہ ماہِ کامل بھی
دو عالم جگمگا اٹھیں گے دوہری چاندنی ہو گی
مانا کہ ان سے رات کا وعدہ ہے اے قمر
کیسے وہ آ سکیں گے اگر چاندنی ہوئی

شکیب جلالی

ابھر کے ڈوب گئی کشتی خیال کہیں
یہ چاند ایک بھنور، چاندنی سمندر ہے

احسان دانش

ایک وہ رات تھی کہ جب تھا مرے گھر وہ ماہتاب
ایک یہ رات ہے کہ اب چاند ہے چاندنی نہیں
رات ڈھلتے جب ان کا خیال آ گیا
ٹکٹکی بندھ گئی چاندنی کی طرف
ان کے جلووں کی جانب نظر اٹھ گئی
موج تھی بڑھ گئی چاندنی کی طرف
بچھڑ کر ان سے یوں غم میں گزاری زندگی ہم نے
سحر تاریک دیکھی سرخ پائی چاندنی ہم نے

زہرا نگاہ

دیر تک روشنی رہی کل رات
میں نے اوڑھی تھی چاندنی کل رات

ماجد صدیقی

کس چاند کی ضو زمیں پہ لایا
یہ جسم ترا، کہ چاندنی ہے

اختر امام رضوی

جو سنگ ہو کے ملائم ہے سادگی کی طرح
پگھل رہا ہے مرے دل میں چاندنی کی طرح

جلیل مانک پوری

ہر رنگ ہے تیرے آگے پھیکا
مہتاب ہے پھول چاندنی کا

شکیل بدایونی

تیرے جلووں سے آشکارا ہوں
چاند کی چاندنی نہیں جاتی
چاند بھی ہے سوگوار ہجر دوست
پھیکی پھیکی چاندنی ہے آج کل

قتیل شفائی

کسے خبر تھی بڑھے گی کچھ اور تاریکی
چھپے گا وہ کسی بدلی میں چاندنی کی طرح

محبوب خزاں

پلٹ کر یوں نہ دیکھو امڈتے بادلوں سے
بہارِ بے خزاں بھی سرکتی چاندنی ہے

ناصر کاظمی

کتنے مانوس لوگ یاد آئے
صبح کی چاندنی میں کیا کچھ تھا
دور شاخوں کے جھرمٹ میں جگنو بھی گم ہو گئے
چاند میں سو گئی چاندنی سو رہو سو رہو