انشاء اللہ خان انشا

اچھا جو خفا ہم سے ہو تم اے صنم اچھا
لو ہم بھی نہ بولیں گے خدا کی قسم اچھا

بہادر شاہ ظفر

خدا کے واسطے زاہد اٹھا پردہ نہ کعبہ کا
کہیں ایسا نہ ہو یاں بھی وہی کافر صنم نکلے

حیدر علی آتش

محبت کا تری بندہ ہر اک کو اے صنم پایا
برابر گردن شاہ و گدا دونوں کو خم پایا

مصحفی غلام ہمدانی

ہر چند اس کی ہے ہر ادا شوخ
منظور اپنا جو اک صنم ہے
تم بھی آؤگے مرے گھر جو صنم کیا ہو گا
مجھ پر اک رات کرو گے جو کرم کیا ہو گا

مومن خان مومن

ہوا مسلماں میں اور ڈر سے نہ درس واعظ کو سن کے مومنؔ
بنی تھی دوزخ بلا سے بنتی عذابِ ہجر صنم نہ ہوتا

فیض احمد فیض

ہجر کی شب تو کٹ ہی جائے گی
روزِ وصلِ صنم کی بات کرو
دل میں اب یوں ترے بھولے ہوئے غم آتے ہیں
جیسے بچھڑے ہوئے کعبے میں صنم آتے ہیں

باقی صدیقی

قافلے شوق حرم سے گزرے
اوج پر بخت صنم دیکھتے ہیں

عرفان صدیقی

آج تک ان کی خدائی سے ہے انکار مجھے
میں تو اک عمر سے کافر ہوں‘ صنم جانتے ہیں
یوں تو بت خانہ ہے یہ شہر بھی لیکن عرفانؔ
آج تک پھرتے ہیں آنکھوں میں صنم دلی کے

رئیس فروغؔ

کوئے روحانیاں میں سجائے گئے
برہمن زادیوں کے صنم دوستو

ماجد صدیقی

دل کو تسکیں جو صنم دیتے ہیں
شہد میں گھول کے سم دیتے ہیں

شان الحق حقی

بت خانے کا منظر بخدا آج ہی دیکھا
تھے میرے تصور میں صنم اور طرح کے

احمد فراز

ہم موحد ہیں بتوں کے پوجنے والے نہیں
پر خدا لگتی کہیں تو وہ صنم اپنی جگہ

شاذ تمکنت

ایک نادیدہ خدا نے مرے نالے نہ سنے
ایک پتھر کے صنم نے مجھے جینے نہ دیا

قتیل شفائی

مسجدیں ترستی ہیں اس طرف اذانوں کو
اس طرف شوالوں میں رہ گئے صنم تنہا
پتھر نہ پڑیں گر سرِ بازار تو کہنا
تو معترف حسن صنم ہے تو مجھے کیا
منزل سے پلٹ آئے گی ایک ایک تجلی
ہاں شعلۂ رخسارِ صنم ساتھ رہے گا

ناصر کاظمی

کیوں پٹکتا ہے سر سنگ سے جی جلا ڈھنگ سے
دل ہی بن جائے گا خود صنم صبر کر صبر کر