بہادر شاہ ظفر

ٹیڑھے نہ ہو ہم سے رکھو اخلاص تو سیدھا
تم پیار سے رکتے ہو تو لو پیار بھی چھوڑا

داغ دہلوی

ملے جو یار کی شوخی سے اس کی بے چینی
تمام رات دلِ مضطرب کو پیار کیا
تری نگہ کے تصور میں ہم نے اے قاتل
لگا لگا کے گلے سے چھری کو پیار کیا
تو ہے مشہور دل آزار یہ کیا
تجھ پر آتا ہے مجھے پیار یہ کیا
داغؔ کی شکل دیکھ کر بولے
ایسی صورت کو پیار کون کرے

مصحفی غلام ہمدانی

از بس بھلا لگے ہے تو میرے یار مجھ کو
بے اختیار تجھ پر آتا ہے پیار مجھ کو
ہر گھڑی گالیاں ہی دیتے ہو
جان میری یہ پیار کیسا ہے

مومن خان مومن

محو دل دار ہوں کس طرح نہ ہوں دشمنِ جاں
مجھ پہ جب ناصح بیدرد کو پیار آ جائے

فیض احمد فیض

اپنی تکمیل کررہا ہوں میں
ورنہ تجھ سے تو مجھ کو پیار نہیں
فیض کیا جانیے یار کس آس پر، منتظر ہیں کہ لائے گا کوئی خبر
میکشوں پر ہوا محتسب مہرباں، دل فگاروں پہ قاتل کو پیار آ گیا

باقی صدیقی

ہم دامن امید کو چھوڑیں نہ ہاتھ سے
ظالم تو کہہ رہا ہے خدا کو پیار لو

جون ایلیا

تیری صورت کو دیکھ کر مری جاں
خود بخود دل میں پیار اٹھتا ہے

جگر مراد آبادی

کام آخر جذبۂ بے اختیار آ ہی گیا
دل کچھ اس صورت سے تڑپا ان کو پیار آ ہی گیا
ہائے کافر دل کی یہ کافر جنوں انگیزیاں
تم کو پیار آئے نہ آئے مجھ کو پیار آ ہی گیا

قمر جلالوی

گو مری صورت سے نفرت تھی مگر مرنے کے بعد
جب مری تصویر دیکھی ان کو پیار آ ہی گیا

شکیب جلالی

دشتِ احساس میں شعلہ سا کوئی لپکا تھا
اسی بنیاد پہ تعمیر ہوا پیار کا شہر

عرفان صدیقی

میں ضدی لڑکا ماضی کے گرتے ہوئے گھر سے بھاگا ہوا
مجھے پچھلے موسم خط بھیجیں، مجھے گزری راتیں پیار لکھیں
نفرت کے خزانے میں تو کچھ بھی نہیں باقی
تھوڑا سا گزارے کے لیے پیار بچائیں

احسان دانش

نسیمِ صبح نے آ کر وہ راگنی چھیڑی
ہر ایک پھول نے کانٹے کو جھک کے پیار کیا

اختر شیرانی

اب تو ملیے بس لڑائی ہو چکی
اب تو چلئے پیار کی باتیں کریں

بہزاد لکھنوی

اک بے وفا کو پیار کیا ہائے کیا کیا
خود دل کو بیقرار کیا ہائے کیا کیا

عبید اللہ علیم

میں کھلی ہوئی اک سچائی مجھے جاننے والے جانتے ہیں
میں نے کن لوگوں سے نفرت کی اور کن لوگوں کو پیار دیا

علی سردار جعفری

کبھی ٹھہری ہوئی یخ بستہ غموں کی جھیلیں
کبھی سہما ہوا سمٹا ہوا اک پیار آنکھیں
یاد آئے ہیں عہد جنوں کے کھوئے ہوئے دل دار بہت
ان سے دور بسائی بستی جن سے ہمیں تھا پیار بہت

غلام محمد قاصر

یہی منشور محبت ہے کہ وہ پیکر ظلم
جس کو نفرت سے نوازے میں اسے پیار کروں