بہادر شاہ ظفر

خواب میرا ہے عین بیداری
میں تو اس میں بھی دیکھتا کچھ ہوں

شیخ ابراہیم ذوق

لے جائیں تیرے کشتے کو جنت میں بھی اگر
پھر پھر کے تیرے گھر کی طرف دیکھتا چلے

میر مہدی مجروح

ان سا مغرور اور پرسشِ حال
خواب ہے یہ جو دیکھتا ہوں میں

جگر مراد آبادی

ہمیں معلوم ہے ہم سے سنو محشر میں کیا ہو گا
سب اس کو دیکھتے ہوں گے وہ ہم کو دیکھتا ہو گا

جمال احسانی

جو میرے ذکر پر اب قہقہے لگاتا ہے
بچھڑتے وقت کوئی حال دیکھتا اس کا

رئیس فروغؔ

دیر تک میں تجھے دیکھتا بھی رہا
ساتھ اک سوچ کا سلسلہ بھی رہا
کسی کسی کی طرف دیکھتا تو میں بھی ہوں
بہت برا نہیں اتنا برا تو میں بھی ہوں

ادا جعفری

کیا بوجھ تھا کہ جس کو اٹھائے ہوئے تھے لوگ
مڑ کر کسی کی سمت کوئی دیکھتا نہ تھا

اسرار الحق مجاز

اس اک حجاب پہ سو بے حجابیاں صدقے
جہاں سے چاہتا ہوں تم کو دیکھتا ہوں میں

عالم تاب تشنہ

نہیں میرے لیے کیا اور کوئی
اسی کا راستہ کیوں دیکھتا ہوں

عبید اللہ علیم

سلامت آئنے میں ایک چہرہ
شکستہ ہو تو کتنا دیکھتا ہے
عجیب تھی وہ عجب طرح چاہتا تھا میں
وہ بات کرتی تھی اور خواب دیکھتا تھا میں

ماجد صدیقی

کاش! میں جس کے اوپر ہوں اک خوں سا
اپنے اندر کے اس شخص کو دیکھتا
مرغ تھا زد پہ تیرِ قضا کی مگر
آشیاں تھا کھلے بازوؤں دیکھتا
تجھ کو جو بہ غور دیکھتا ہوں
میں خود ہی پہ رشک کر رہا ہوں
آؤ کہ یہ رت نہ پھر ملے گی
میں آپ کی راہ دیکھتا ہوں
نظر اٹھے بھی تو خود ہی کو دیکھتا ہوں میں
نجانے کون سے جنگل میں آ بسا ہوں میں
یہ کیوں ہر ایک حقیقت لگے ہے افسانہ
یہ کس نگاہ سے دنیا کو دیکھتا ہوں میں

حفیظ جالندھری

اس کی صورت کو دیکھتا ہوں میں
میری سیرت وہ دیکھتا ہی نہیں

رسا چغتائی

جن آنکھوں سے مجھے تم دیکھتے ہو
میں ان آنکھوں سے دنیا دیکھتا ہوں

امیر مینائی

وا کردہ چشم دل صفت نقشِ پا ہوں میں
ہر رہ گزر میں راہ تری دیکھتا ہوں میں

فراق گورکھپوری

لیتی ہیں الٹی سانسیں جب شامِ غم فضائیں
اس دم فنا بقا کی میں نبض دیکھتا ہوں

قتیل شفائی

کس کس کا نام لاؤں زباں پر کہ تیرے ساتھ
ہر روز ایک شخص نیا دیکھتا ہوں میں
جاگا ہوا ضمیر وہ آئینہ ہے قتیلؔ
سونے سے پہلے روز جسے دیکھتا ہوں میں

محبوب خزاں

کوئی قریب نہ آئے شکستہ پا ہوں میں
کرم تو ہے مگر انجام دیکھتا ہوں میں

ناصر کاظمی

ہر ذرہ ایک محملِ عبرت ہے دشت کا
لیکن کسے دکھاؤں کوئی دیکھتا بھی ہو
بیٹھا ہے ایک شخص مرے پاس دیر سے
کوئی بھلا سا ہو تو ہمیں دیکھتا بھی ہو