مرزا غالب

عرضِ نیازِ عشق کے قابل نہیں رہا
جس دل پہ ناز تھا مجھے وہ دل نہیں رہا

داغ دہلوی

مسیحا نے ترے بیمار کو دیکھا تو فرمایا
نہ یہ جینے کے قابل ہے نہ یہ مرنے کے قابل ہے

فیض احمد فیض

خمِ ساقی میں جز زہرِ ہلاہل کچھ نہیں باقی
جو ہو محفل میں اس اکرام کے قابل، ٹھہر جائے

یگانہ چنگیزی

مجبور ہوں کیا زور چلے جوش جنوں سے
زنجیر کوئی پاؤں کے قابل نہیں رکھتا

باقی صدیقی

تیری رحمت کا سہارا مل گیا
ورنہ بندہ تو کسی قابل نہ تھا

جگر مراد آبادی

لاکھوں میں انتخاب کے قابل بنا دیا
جس دل کو تم نے دیکھ لیا دل بنا دیا
اب زباں بھی دے ادائے شکر کے قابل مجھے
درد بخشا ہے اگر تو نے بجائے دل مجھے
پھونک دے اے غیرت سوزِ محبت پھونک دے
اب سمجھتی ہیں وہ نظریں رحم کے قابل مجھے
درد محرومی سہی احساس ناکامی سہی
اس نے سمجھا تو بہر صورت کسی قابل مجھے
ہمیں کیوں وہ جفائے خاص کے قابل سمجھتے ہیں
یہ رازِ دل ہے اس کو محرمان دل سمجھتے ہیں

قمر جلالوی

قفس سے چھوٹ کر صیاد دیکھ آئینگے گلشن بھی
ہمارا آشیاں رہنے کے اب قابل تو کیا ہو گا

عرفان صدیقی

عشق کیا کارِ ہوس بھی کوئی آسان نہیں
خیر سے پہلے اسی کام کے قابل ہو جاؤ

احسان دانش

زندگی میں اس کو کیف زندگی حاصل نہیں
جس کا دل راز و نیازِ عشق کے قابل نہیں
التماس شوق پر احسانؔ محشر ڈھ گیا
ان کا شرما کر یہ کہنا میں ترے قابل نہیں
اپنے احسانؔ کو تو ہی کوئی تدبیر بتا
جس سے یہ ننگ محبت ترے قابل ہو جائے

تلوک چند محروم

کہاں ذرہ کہاں خورشید خوش فہمی ہے یہ اپنی
کہ خود کو جلوہ گاہ دوست کے قابل سمجھتے ہیں
وہ دل کہاں ہے اہلِ نظر دل کہیں جسے
یعنی نیازِ عشق کے قابل کہیں جسے

سیماب اکبر آبادی

دل میں وہ شورشِ جذبات وہ گرمی نہ رہی
اب یہ شاید نگہ دوست کے قابل ہو جائے
قدر انساں ہے ابھی بزم عدم میں سیمابؔ
کیوں وہ دنیا میں رہے جو کسی قابل ہو جائے

شکیل بدایونی

وہ کس ناز و انداز سے کہہ رہے ہیں
شکیلؔ اب محبت کے قابل نہیں ہے

فانی بدایونی

غم حسنِ مکمل تھا دلِ حیرت کامل تھا
تصویر کا آئینہ تصویر کے قابل تھا
ہاں آپ کسی کو یوں برباد نہیں کرتے
یہ فانیؔٔ ناکارا سچ ہے اسی قابل تھا

قابل اجمیری

خود اس کی زندگی اب اس سے برہم ہوتی جاتی ہے
انہیں ہو گا بھی پاسِ خاطر قابلؔ تو کیا ہو گا

مجروح سلطان پوری

اس باغ میں وہ سنگ کے قابل کہا نہ جائے
جب تک کسی ثمر کو مرا دل کہا نہ جائے

ناصر کاظمی

بھلا ہوا کہ ہمیں یوں بھی کوئی کام نہ تھا
جو ہاتھ ٹوٹ گئے ٹوٹنے کے قابل تھے