بہادر شاہ ظفر

نہیں عشق میں اس کا تو رنج ہمیں کہ قرار و شکیب ذرا نہ رہا
غمِ عشق تو اپنا رفیق رہا کوئی اور بلا سے رہا نہ رہا

داغ دہلوی

ہم تصور میں بھی جو بات ذرا کہتے ہیں
سب میں اڑ جاتی ہے ظالم اسے کیا کہتے ہیں

شیخ ابراہیم ذوق

نہ شبِ ہجر میں لگتی ہے زباں تالو سے
اور نہ پہلو مرا بستر سے ذرا لگتا ہے
رات کا وعدہ ہے بندے سے اگر بندہ نواز
بند میں دے لو گرہ تا کہ ذرا یاد رہے

مصحفی غلام ہمدانی

مصحفیؔ ٹل گئے سب معرکۂِ عشق کے بیچ
وہ جو ٹھہرے رہے ہیں ایک ذرا ہم ہی ہیں
کہتا ہے وقتِ نزع مریض اس کا اس سے یوں
لگنے دے میری آنکھ تو اس دم ذرا سرک
کباب لختِ دل میرے نمک سود محبت ہیں
تمہارے واسطے لایا ہوں سینے پر ذرا چکھو

مومن خان مومن

اثر اس کو ذرا نہیں ہوتا
رنج راحت فزا نہیں ہوتا
وہ جو لطف مجھ پہ تھے بیشتر وہ کرم کہ تھا مرے حال پر
مجھے سب ہے یاد ذرا ذرا تمہیں یاد ہو کہ نہ یاد ہو

میر مہدی مجروح

گو عمر بسر اس کی تحقیق میں کی تو بھی
ماہیت اصلی کو اپنی نہ ذرا جانا

فیض احمد فیض

آنے میں تامل تھا اگر روز جزاً کو
اچھا تھا ٹھہر جاتے اگر تم بھی ذرا اور

جون ایلیا

نئی کلیاں جو اب کھلی ہیں وہاں
ان کی خوشبو کو اک ذرا بھیجو

عرفان صدیقی

تجھ کو اس سے کیا میں امرت ہوں کہ اک پانی کی بوند
چارہ گر، سوکھی زبانوں تک ذرا لے چل مجھے

مجید امجد

یہ زرد پنکھڑیاں جن پر کہ حرف حرف ہوں میں
ہوائے شام میں مہکیں ذرا، جو تو چاہے

رئیس فروغؔ

کتنی ہی بارشیں ہوں شکایت ذرا نہیں
سیلانیوں کو خطرۂسیل بلا نہیں

بیخود بدایونی

اس بزم میں نہ ہوش رہے گا ذرا مجھے
اے شوق ہرزہ تاز کہاں لے چلا مجھے
رحم ان کو نہ آیا تھا تو شرم ہی آ جاتی
بیداد کے شکوے پر جھکتیں تو ذرا آنکھیں
تم جان کو کھو بیٹھو یا آنکھوں کو رو بیٹھو
بیخودؔ نہ ملائیں گے وہ تم سے ذرا آنکھیں

احمد راہی

پہلے ہی مجھ پہ کم نہیں تیری عنایتیں
دم لینے دے اے گردش دوراں ذرا مجھے

ماجد صدیقی

اے جینے کے رستے مجھ پر اور بھی کچھ ہو بند ابھی
میں کہ نہیں ہوں اندھا بھی تو میری آنکھیں کھول ذرا

حفیظ جالندھری

ہے حسن یہی شے تو گماں اور نہ کیجے
سودا نہیں مطلوب ذرا دیکھ رہا ہوں

شکیل بدایونی

رنگ صنم کدہ جو ذرا یاد آ گیا
ٹوٹیں وہ بجلیاں کہ خدا یاد آ گیا

احمد فراز

اب سچ کہیں تو یارو ہم کو خبر نہیں تھی
بن جائے گا قیامت اک واقعہ ذرا سا

امیر مینائی

دلِ مضطر سے کہہ دو تھوڑے تھوڑے سب مزے چکھے
ذرا بہکے ذرا سنبھلے ذرا تڑپے ذرا ٹھہرے

شاذ تمکنت

یادوں سے کہو میری بالیں سے چلی جائیں
اب اے شبِ تنہائی آرام ذرا لوں گا
تو پھر یہ آدمی خود کو خدا سمجھنے لگے
اگر یہ عمرِ گریزاں ذرا بھی راس آئے
مدتوں بعد کسی بند دریچے کے قریب
کیا خبر تھی مری رفتار ذرا ٹھہرے گی

ناصر کاظمی

ہے یہی ساعتِ ایجاب و قبول
صبح کی لے کو ذرا غور سے سن
اداس پھرتا ہوں میں جس کی دھن میں برسوں سے
یونہی سی ہے وہ خوشی بات وہ ذرا سی ہے