مرزا غالب

چھوڑا مہِ نخشب کی طرح دستِ قضا نے
خورشید ہنوز اس کے برابر نہ ہوا تھا
کرتے ہو مجھ کو منعِ قدم بوس کس لیے ؟
کیا آسمان کے بھی برابر نہیں ہوں میں؟

امام بخش ناسخ

نامۂِ یار کے لکھنے کو مجھے ارزاں ہے
تول دے گر کوئی سونے کے برابر کاغذ

فیض احمد فیض

اب کوچہء دلبر کا رہرو، رہزن بھی بنے تو بات بنے
پہرے سے عدو ٹلتے ہی نہیں اور رات برابر جاتی ہے

قمر جلالوی

حرس تو دیکھ فلک بھی مجھ پہ کرتا ہے ظلم
کوئی پوچھے تو بھی کیا ان کے برابر ہو گیا

عرفان صدیقی

میں نے رات اک خواب دیکھا اور روشن ہو گیا
دیکھتا کیا ہوں کہ ہے میرے برابر روشنی
کوئی سلطان نہیں میرے سوا میرا شریک
مسندِ خاک پہ بیٹھا ہوں برابر اپنے

مصطفی زیدی

دردِ دل بھی غمِ دوراں کے برابر سے اٹھا
آگ صحرا میں لگی اور دھواں گھر سے اٹھا

جمال احسانی

یار لوگوں نے بہت رنج دیے تھے مجھ کو
جا چکا ہے جو حساب اپنا برابر کر کے
منحوس ایک شکل ہے جس سے نہیں فرار
پرچھائیں کی طرح سے برابر لگی ہوئی

بشیر بدر

کوئی بادل ہو تو تھم جائے مگر اشک مرے
ایک رفتار سے دن رات برابر برسے

غلام محمد قاصر

سن لیتے ہیں سرگوشی کو چپ میں ڈھلتے ہوئے
چن لیتے ہیں تیر جو اپنے برابر گرتے ہیں

ماجد صدیقی

یہ الگ بات کہ پیچھا نہ کیا
گھر سے تو اس کے برابر نکلا

ثروت حسین

آنکھوں میں دمک اٹھی ہے تصویر در و بام
یہ کون گیا میرے برابر سے نکل کر

حسرت موہانی

بھلاتا لاکھ ہوں لیکن برابر یاد آتے ہیں
الٰہی ترکِ الفت پر وہ کیونکر یاد آتے ہیں

اختر ہوشیارپوری

شام تنہائی دھواں اٹھتا برابر دیکھتے
پھر سر شب چاند ابھرنے کا بھی منظر دیکھتے

افضل منہاس

سوچ کا پیڑ جواں ہو کے بنا ایسا رفیق
ذہن کے قد نے اسے اپنے برابر دیکھا

اکبر حمیدی

یہ کیسا شہر ہے مظلوم چپ ہیں
مگر ظالم برابر بولتے ہیں

احمد فراز

غافل نہ جان اسے کہ تغافل کے باوجود
اس کی نظر ہے سب پہ برابر لگی ہوئی

اقبال ساجد

پیاسے کے پاس رات سمندر پڑا ہوا
کروٹ بدل رہا تھا برابر پڑا ہوا
قرب جب حد سے بڑھا دوری مقدر ہو گئی
اس کا ملنا بھی نہ ملنے کے برابر ہو گیا

شاذ تمکنت

میں آپ اپنے جرم و سزا کا حریف ہوں
الزام شوق سب کے برابر مجھے نہ دو
ہم تان کے سوئے تھے کہ کیوں آئے گا وہ شاذؔ
دیتا رہا دستک وہ برابر کئی دن تک

قتیل شفائی

مجھ کو ڈرا رہی تھی زمانے کی ہم سری
دیکھا تو اپنے قد کے برابر بھی میں ہی تھا