حیدر علی آتش

سیر نعمت سے دو جہان کی کیا
دے کے شبنم کو بوند پانی کی
مثل شبنم ہوں صاف دل قانع
مجھ کو دریا ہے بوند پانی کی
لیے ہیں بوسۂِ رخسارۂِ صاف
پیا ہے ہم نے آئینہ کا پانی

داغ دہلوی

دل کی قلب ماہیت کا ہو اسے کیونکر یقیں
کب ہوا مٹی ہوئی ہے آگ کب پانی ہوئی

شیخ ابراہیم ذوق

خاک سے تشنۂِ دیدار کے سبزہ جو اٹھے
تو زباں اپنی نکالے ہوئے پانی مانگے
مار پیچاں تو بلا ہے گا مگر تو اے زلف
ہے وہ کافر کہ نہ کاٹا ترا پانی مانگے

مصحفی غلام ہمدانی

رکھیں ہیں جی میں مگر مجھ سے بد گمانی آپ
جو میرے ہاتھ سے پیتے نہیں ہیں پانی آپ
دل معشوق پتھر ہے تو ہووے
میں اس کو پانی پانی کر رہا ہوں
کیوں کہ استقلال کا دم ماریں ہم
استخواں اپنے تو ہیں پانی صریح

مرزا رفیع سودا

بلبل ہی سسکتی نہ تھی کچھ باغ میں تجھ بن
شبنم گلوں کے منہ میں چواتی رہی پانی

یگانہ چنگیزی

درد کا ساغر بھی ساقی میری قسمت میں نہ تھا
شوق میں کرنا پڑا آخر لہو پانی مجھے

جون ایلیا

رنگ کی اپنی بات ہے ورنہ
آخرش خون بھی تو پانی ہے
اک عبث کا وجود ہے جس سے
زندگی کو مراد پانی ہے

عبدالحمید عدم

بس اس قدر ہے خلاصہ مری کہانی کا
کہ بن کے ٹوٹ گیا اک حباب پانی کا
زندگی کی قید کوئی قید ہے
سوکھتے تالاب کا پانی ہوں میں
زندگی ہے اک کرائے کی خوشی
سوکھتے تالاب کا پانی ہوں میں

قمر جلالوی

سحر کے وقت منہ کلیوں نے کھولا ہے پئے شبنم
ہوا ٹھنڈی ہے مگر پیاس بے پانی نہیں جاتی

شکیب جلالی

چلو گے ساتھ مرے ‘ آ گہی کی سرحد تک؟
یہ رہ گزار اترتی ہے گہرے پانی میں

عرفان صدیقی

آگ بن کر کبھی شریانوں میں بہتا ہوا خون
کبھی آنکھوں سے برستا ہوا پانی بارش
مسکراتا ہوں تو اکثر یہ خیال آتا ہے
آنکھ میں نم ابھی برسے ہوئے پانی کا نہ ہو

جمال احسانی

نہ ہوا اور نہ مٹی پہ کبھی ہو پایا
جو بھروسا ہے مجھے بہتے ہوئے پانی پر
ایک قدم خشکی پر ہے اور دوسرا پانی میں
ساری عمر بسر کر دی ہے نقل مکانی میں
سارے ساحل سارے ساگر اس کی ہیں میراث
جس کے پاؤں زمیں پر ٹھہریں بہتے پانی میں

اکبر معصوم

ایسا ایک مقام ہو جس میں دل جیسی ویرانی ہو
یادوں جیسی تیز ہوا ہو درد سے گہرا پانی ہو

آنس معین

جیون کو دکھ دکھ کو آگ اور آگ کو پانی کہتے
بچے لیکن سوئے ہوئے تھے کس سے کہانی کہتے

بہزاد لکھنوی

بجھائی ہے پیاس آج دامن کی ہم نے
شراب نظر کر کے پانی لٹا دی

بشیر بدر

پتھر کے جگر والو غم میں وہ روانی ہے
خود راہ بنا لے گا بہتا ہوا پانی ہے
دل سے جو چھٹے بادل تو آنکھ میں ساون ہے
ٹھہرا ہوا دریا ہے بہتا ہوا پانی ہے
غم وجہ فگار دل غم وجہ قرار دل
آنسو کبھی شیشہ ہے آنسو کبھی پانی ہے
شام آنکھوں میں آنکھ پانی میں
اور پانی سرائے فانی میں
جھلملاتے ہیں کشتیوں میں دیے
پل کھڑے سو رہے ہیں پانی میں
وہ ہوا ہے اسے کہاں ڈھونڈوں
آگ میں خاک میں کہ پانی میں

عبید اللہ علیم

کوزۂ حرف میں لایا ہوں تمہاری خاطر
روح پر اترے ہوئے ایک عجب پانی کو

غلام محمد قاصر

عکس کی صورت دکھا کر آپ کا ثانی مجھے
ساتھ اپنے لے گیا بہتا ہوا پانی مجھے

ثروت حسین

قسم اس آگ اور پانی کی
موت اچھی ہے بس جوانی کی
گھر سے نکلا تو ملاقات ہوئی پانی سے
کہاں ملتی ہے خوشی اتنی فراوانی سے
سورما جس کے کناروں سے پلٹ آتے ہیں
میں نے کشتی کو اتارا ہے اسی پانی میں

سیماب اکبر آبادی

دیکھ اے ساقی قناعت کی طرب افشانیاں
آبِ کوثر ہے کٹورے میں مرے پانی نہیں

احمد فراز

آبِ زمزم دوست لائے ہیں عبث
ہم جو پیتے ہیں‌ وہ پانی اور ہے
دل کو کیا روئیں کہ جب سوکھ گئی ہوں آنکھیں
شہر ویراں ہے کہ دریاؤں میں پانی کم ہے
اس دورِ بے جنوں کی کہانی کوئی لکھو
جسموں کو برف، خون کو پانی کوئی لکھو

اقبال ساجد

رہ گئی تھی لعل بننے میں کمی اک آنچ کی
آنکھ سے گر کر لہو کی بوند پانی ہو گئی
وہ چاند ہے تو عکس بھی پانی میں آئے گا
کردار خود ابھر کے کہانی میں آئے گا
کب تک لہو کے حبس سے گرمائے گا بدن
کب تک ابال آگ سے پانی میں آئے گا
پیاسو رہو نہ دشت میں بارش کے منتظر
مارو زمیں پہ پاؤں کہ پانی نکل پڑے

امیر مینائی

خنجرِ قاتل نہ کر اتنا روانی پر گھمنڈ
سخت کم ظرفی ہے اک دو بوند پانی پر گھمنڈ
ہے یہی تاثیر آبِ خنجر جلاد میں
چشمۂ حیواں نہ کر تو اپنے پانی پر گھمنڈ

فراق گورکھپوری

زندگی درد کی کہانی ہے
چشم انجم میں بھی تو پانی ہے
ضبط کیجے تو دل ہے انگارا
اور اگر رویے تو پانی ہے
گردش چشمِ ساقی دوراں
دور افلاک کی بھی پانی ہے
دل کو شعلوں سے کرتی ہے سیراب
زندگی آگ بھی ہے پانی بھی

کیف بھوپالی

کیفؔ تجھ کو دنیا نے کیا سے کیا بنا ڈالا
یار اب ترے منہ پر رنگ ہے نہ پانی ہے

محسن احسان

بہتے ہوئے لمحوں کی کہانی ہی بدل دے
دریا تو بدلتا نہیں پانی ہی بدل دے

ناصر کاظمی

سناتا ہے کوئی بھولی کہانی
مہکتے میٹھے دریاؤں کا پانی

نوح ناروی

برق و باراں کے جلو میں بدلیاں
ساتھ لے کر آگ پانی آ گئیں
غریق بحر ستم نہ کیوں ہوں یہ جاں فشانی ہے اور ہم ہیں
کہ آپ ہیں آپ کی چھری ہے چھری کا پانی ہے اور ہم ہیں
بھرے ہوئے چشمِ تر میں آنسو جگر میں بھڑکی ہوئی تپ غم
یہ آگ ہے اور یہ ہے پانی یہ آگ پانی ہے اور ہم ہیں