حیدر علی آتش

اٹھ گئی ہیں سامنے سے کیسی کیسی صورتیں
رویے کس کے لیے کس کس کا ماتم کیجیے
زخمِ خنداں ہیں بعینہ لب خنداں اپنے
شادمانی میں ہے یاں حالت ماتم پیدا

داغ دہلوی

ہم نے مر کر ہجر میں پائی شفا
ایسے اچھوں کا وہ ماتم کیا کریں
فلک دیتا ہے جن کو عیش ان کو غم بھی ہوتے ہیں
جہاں بجتے ہیں نقارے وہیں ماتم بھی ہوتے ہیں

شیخ ابراہیم ذوق

ترے بیمار غم کے ہیں جو غم خوار
برستا ان پہ ہے ماتم ابھی سے

فیض احمد فیض

لو سنی گئی ہماری، یوں پھرے ہیں دن کہ پھر سے
وہی گوشۂ قفس ہے ، وہی فصلِ گل کا ماتم

جگر مراد آبادی

سحر ہونے کو ہے بیدار شبنم ہوتی جاتی ہے
خوشی منجملہ و اسباب ماتم ہوتی جاتی ہے

مصطفی زیدی

اپنی حالت پر ہنسی بھی آئی تھی
اس ہنسی کا بھی بڑا ماتم رہا

رئیس فروغؔ

جی میں آتا ہے کسی روز اکیلا پا کر
میں تجھے قتل کروں پھر ترے ماتم میں رہوں

احسان دانش

ربابِ زندگی کے زمزموں پر جھومنے والے
ہر اک نغمے میں نا معلوم سا ماتم بھی ہوتا ہے

زہرا نگاہ

خار خمیدہ سر تھے بگولے بے آواز
صحرا میں بھی آج کسی کا ماتم تھا

ظہیر کاشمیری

ظہیرؔ ان کو ہمارے دل کی ہر شوخی گوارا تھی
انہیں کرنا پڑے گا اب ہمارے دل کا ماتم بھی

عبید اللہ علیم

یار مرا زنجیریں پہنے آیا ہے بازاروں میں
میں کہ تماشا دیکھنے والے لوگوں کے ماتم میں ہوں

احمد راہی

کبھی حیات کا غم ہے کبھی ترا غم ہے
ہر ایک رنگ میں ناکامیوں کا ماتم ہے

تلوک چند محروم

بس اے دست اجل کچھ رحم بھی کر
کہ دنیا بزم ماتم ہو گئی ہے

جوش ملیح آبادی

دن کے ہنگاموں کو کیجیے دل کے سناٹے میں غرق
رات کی خاموشیوں کو وقف ماتم کیجیے

حفیظ ہوشیارپوری

پروانے کی خاک پریشاں شمع کی لو بھی لرزاں لرزاں
محفل کی محفل ہے ویراں کون کرے اب کس کا ماتم
اپنے اپنے دل کے ہاتھوں دونوں ہی برباد ہوئے ہیں
میں ہوں اور وفا کا رونا وہ ہیں اور جفا کا ماتم

فانی بدایونی

قاتل ہی مرا کیوں اسے کہتا ہے زمانہ
مانا وہ شریک صفِ ماتم نہ ہوا تھا
موت جس کی حیات ہو فانیؔ
اس شہید ستم کا ماتم کیا
دل کمال حیات ہے فانیؔ
دل کے مارے ہوؤں کا ماتم کیا

احمد فراز

ہمیں بھی یاد ہے مرگِ تمنا
مگر اب فرصتِ ماتم نہیں ہے

شاذ تمکنت

تری جدائی میں تارے بجھے ہیں پلکوں پر
نکلتے چاند کا ماتم رہا ہے آنکھوں میں

فراق گورکھپوری

یہ بھی نظم حیات ہے کوئی
زندگی زندگی کا ماتم ہے

قتیل شفائی

پروانوں کی راکھ اڑا دی بادِ سحر کے جھونکوں نے
شمع بنی ہے پیکر ماتم دیکھنے والے دیکھتا جا

مجروح سلطان پوری

جہاں مجروحؔ دل کے حوصلے ٹوٹیں نگاہوں سے
وہاں کرتے بھی مرگ شوق کا ماتم تو کیا کرتے