حیدر علی آتش

بہارِ گل میں ہیں دریا کے جوش کی لہریں
بھلا میں کشتی مے سے کنارہ کیا کرتا
خم شراب سے مجھ مست نے نہ منہ پھیرا
کنارِ آب سے پیاسا کنارہ کیا کرتا

عرفان صدیقی

یہ موج موج کا اک ربط درمیاں ہی سہی
تو کیا ہوا میں اگر دوسرا کنارہ ہوا
امیدواروں پہ کھلتا نہیں وہ بابِ وصال
اور اس کے شہر سے کرتا نہیں کنارہ کوئی
ہر آفتاب کو آخر غروب ہونا ہے
سو ہم بھی ڈوب رہے ہیں سرِ کنارۂ شام
مری خاکِ بدن آخر اسی مٹی کا حصہ ہے
سو کشتی کھولتا ہوں اور کنارہ دیکھتا ہوں میں

جمال احسانی

نہ کوئی فال نکالی نہ استخارہ کیا
بس ایک صبح یوں ہی خلق سے کنارہ کیا

فارغ بخاری

ہر ایک موج ہو اٹھتی جوانیوں کی دھنک
بنوں تو ایسے سمندر کا میں کنارہ بنوں