داغ دہلوی

سبب کھلا یہ ہمیں ان کے منہ چھپانے کا
اڑا نہ لے کوئی انداز مسکرانے کا

مومن خان مومن

بوالہوس روئے میرے گریہ پہ اب
منہ کہاں تیرے مسکرانے کو

میر مہدی مجروح

میری نظروں نے کیا کہا یا رب
کیوں وہ شرما کے مسکرانے لگے
خفا ہو کے جب بے بلائے گیا
مجھے دیکھ کر مسکرانے لگے

باقی صدیقی

اب نہیں تاب زخم کھانے کی
کر نہ تکلیف مسکرانے کی
سحر کے آئنے کا کوئی اعتبار نہیں
کلی تو دیکھ کے عکس اپنا مسکرانے لگی

جون ایلیا

اک اجتہاد کا پہلو ضرور ہے تجھ میں
خوشی ہوئی ترے نا وقت مسکرانے سے

عبدالحمید عدم

اے غمِ زندگی نہ ہو ناراض
مجھ کو عادت ہے مسکرانے کی

قمر جلالوی

میں حالاتِ شامِ الم کہہ رہا ہوں ذرا غیرتِ عشق ملحوظِ خاطر
تمھیں عمر بھر مجھ کو رونا پڑے گا کہیں مسکرانے کی کوشش نہ کرنا

عرفان صدیقی

دعائے شامِ دل آزردگاں بھی کیا شے ہے
چراغ جلنے لگے ‘ رات مسکرانے لگی

الطاف حسین حالی

حق وفا کے جو ہم جتانے لگے
آپ کچھ کہہ کے مسکرانے لگے

ادا جعفری

آخری ٹیس آزمانے کو
جی تو چاہا تھا مسکرانے کو

شکیل بدایونی

نہ سوچا تھا یہ دل لگانے سے پہلے
کہ ٹوٹے گا دل مسکرانے سے پہلے

فانی بدایونی

وہ صبحِ عید کا منظر ترے تصور میں
وہ دل میں آ کے ادا تیرے مسکرانے کی

فراق گورکھپوری

پر اسرار سی میری عرضِ تمنا
وہ کچھ زیرِ لب مسکرانے کی راتیں

مجروح سلطان پوری

میں کہ ایک محنت کش میں کہ تیرگی دشمن
صبحِ نو عبارت ہے میرے مسکرانے سے

ناصر کاظمی

وہ دل میں کھبنے والی آنکھیں کیا ہوئیں
وہ ہونٹ مسکرانے والے کیا ہوئے