داغ دہلوی

تم نے ہمارے دل میں گھر کر لیا تو کیا ہے
آباد کرتے آخر ویرانے آدمی ہیں

شیخ ابراہیم ذوق

میں ہوں وہ خشت کہن مدت سے اس ویرانے میں
برسوں مسجد میں رہا برسوں رہا مے خانہ میں

مصحفی غلام ہمدانی

نہ سمجھو تم کہ میں دیوانہ ویرانے میں رہتا ہوں
خیال روئے خوباں سے پری خانے میں رہتا ہوں

فیض احمد فیض

ہم سے کہتے ہیں چمن والے ، غریبانِ چمن
تم کوئی اچھا سا رکھ لو اپنے ویرانے کا نام

یگانہ چنگیزی

پھر وہی کوچہ وہی در وہی سودا وہی سر
کھینچ لایا ہے یہ دل پھر مجھے ویرانے سے
آج ہی چھوٹے جو کل چھٹتا ہو یہ دیر خراب
وحشت آباد جہاں کم نہیں ویرانے سے
حسن معنی کے جو شیدا ہیں ادھر کیا دیکھیں
صورت آباد جہاں کم نہیں ویرانے سے

باقی صدیقی

کیا تری انجمن آرائیاں یاد آئی ہیں
کیوں پلٹ آئے ہیں وحشی ترے ویرانے سے
کسی امید پہ پھر بھی نظر بھٹکتی ہے
اگرچہ چھان چکے ہیں دلوں کے ویرانے

قمر جلالوی

ہم کو ہم خاک نشینوں کا خیال آنے تک
شہر تو شہر بدل جائیں گے ویرانے تک
لاکھ دیوانے کھلائیں گل چمن کہہ دے گا کون
عارضی پھولوں سے بدلے گا نہ ویرانے کا نام
سنائے کوئی کہاں تک جنوں کے افسانے
نہ جانے ہو گئے آباد کتنے ویرانے
گری فصلِ چمن پر برق دیوانے یہ کیا جانیں
مصیبت باغ پر گزری تھی ویرانے پہ کیا گزری

عرفان صدیقی

دل ہو یا آنکھ بس اک رات کا ڈیرا اپنا
ہم تو بنجارے ، نہ بستی کے ، نہ ویرانے کے

جوش ملیح آبادی

کچھ سیکھ سکیں شاید آبادیاں شہروں سے
اے راہروو ٹھہرو کچھ کہتے ہیں ویرانے

خاطر غزنوی

وحشتیں کچھ اس طرح اپنا مقدر ہو گئیں
ہم جہاں پہنچے ، ہمارے ساتھ ویرانے گئے

سیف الدین سیف

طے نہ ہوئے دل کے ویرانے
تھک کر بیٹھ گئے دیوانے
آج پھر آنکھوں میں پھرتے ہیں
عہدِ تمنا کے ویرانے

شاد عظیم آبادی

بوریا تھا کچھ شبینہ مے تھی یا ٹوٹے سبو
اور کیا اس کے سوا مستوں کے ویرانے میں تھا
شادؔ کچھ پوچھو نہ مجھ سے میرے دل کے داغ کو
ٹمٹماتا سا چراغ اک اپنے ویرانے میں تھا

فانی بدایونی

خلق کہتی ہے جسے دل ترے دیوانے کا
ایک گوشہ ہے یہ دنیا اسی ویرانے کا

کیفی اعظمی

یہاں سے جلد گزر جاؤ قافلے والو
ہیں میری پیاس کے پھونکے ہوئے یہ ویرانے

مجروح سلطان پوری

ملی جب ان سے نظر بس رہا تھا ایک جہاں
ہٹی نگاہ تو چاروں طرف تھے ویرانے

ناصر کاظمی

کہاں ہے تو کہ ترے انتظار میں اے دوست
تمام رات سلگتے ہیں دل کے ویرانے
ان ہنستے ہونٹوں کے پیچھے کتنے دکھ ہیں ہم سے پوچھ
ہم نے دیکھے ہیں ویرانے انٹر کانٹی نینٹل میں