داغ دہلوی

نگاہ شوخ جب اس سے لڑی ہے
تو بجلی تھرتھرا کر گر پڑی ہے
اسے بھی مجھ کو بھی ضد آ پڑی ہے
خرابی بیچ والوں کی بڑی ہے
کریں کیا رند توبہ مے سے زاہد
کہ یہ تو ان کی گھٹی میں پڑی ہے
عدو بھی تنگ ہے ان کے ستم سے
اسے اپنی مجھے اپنی پڑی ہے
وہ روٹھیں غیر سے تو ہم منائیں
پرائی آفت اپنے سر پڑی ہے
بگڑ کر ہم نے سو الزام پائے
اب ان کی ہر طرح سے بن پڑی ہے

شیخ ابراہیم ذوق

کل اس سے ہم نے ترکِ ملاقات کی تو کیا
پھر اس بغیر کل نہ پڑی دو گھڑی کے بعد
پروانہ گرد شمع کے شب دو گھڑی رہا
پھر دیکھی اس کی خاک پڑی دو گھڑی کے بعد

بشیر بدر

کہانی کہنے والے کہہ رہے ہیں
مگر جانے وہی جس پر پڑی ہو

بیان میرٹھی

وہ دریا بار اشکوں کی جھڑی ہے
کہ حوت آسماں تہہ میں پڑی ہے
مرے ارماں بتوں کی سرد مہری
زراعت برف کے پالے پڑی ہے
نگاہ یاس کس کی کر گئی چوٹ
کہ گردن تیغ کی ڈھلکی پڑی ہے
کفن سے منہ لپیٹے میری حسرت
دل ویراں کے کونے میں پڑی ہے
کسی کو پار اتارے گا فلک کیا
اسی کی ناؤ چکر میں پڑی ہے
بنا لے عقل آگ کا پتلا فلاطوں
کہ تلچھٹ کچھ مرے خم میں پڑی ہے
بلائے زلف مہماں سے کہوں کیا
نہیں ٹلتی مرے سر آ پڑی ہے
سر محشر بڑھی ہے کس قدر زلف
قیامت کس قدر اوچھی پڑی ہے

احمد راہی

دل پہ جب درد کی افتاد پڑی ہوتی ہے
دوستو وہ تو قیامت کی گھڑی ہوتی ہے

ماجد صدیقی

کیا ہے مدھم اگر پڑی آواز
دبنے والی نہیں مری آواز

سیف الدین سیف

ابھی نہ جاؤ کہ تاروں کا دل دھڑکتا ہے
تمام رات پڑی ہے ذرا ٹھہر جاؤ

سیماب اکبر آبادی

سرِ محشر حجاب و شوق کا اک معرکہ ہو گا
انہیں اپنی پڑی ہو گی مجھے اپنی پڑی ہو گی

شکیل بدایونی

حاصل ترکِ محبت دیکھنا
انجمن سونی پڑی ہے آج کل

احمد فراز

کتنے ناداں ہیں ترے بھولنے والے کہ تجھے
یاد کرنے کے لیے عمر پڑی ہو جیسے
تیرے ماتھے کی شکن پہلے بھی دیکھی تھی مگر
یہ گرہ اب کے مرے دل میں پڑی ہو جیسے
منزلیں دور بھی ہیں منزلیں نزدیک بھی ہیں
اپنے ہی پاؤں میں زنجیر پڑی ہو جیسے

قابل اجمیری

دل رسم و رہ شوق سے مانوس تو ہو لے
تکمیل تمنا کے لیے عمر پڑی ہے
چاہا بھی اگر ہم نے تری بزم سے اٹھنا
محسوس ہوا پاؤں میں زنجیر پڑی ہے

ناصر کاظمی

وقت اچھا بھی آئے گا ناصر
غم نہ کر زندگی پڑی ہے ابھی
پھر کاگا بولا گھر کے سونے آنگن میں
پھر امرت رس کی بوند پڑی تم یاد آئے

نوح ناروی

کیوں آپ کو خلوت میں لڑائی کی پڑی ہے
ملنے کی گھڑی ہے کہ یہ لڑنے کی گھڑی ہے
کیا جانیے کیا حال ہمارا ہو شبِ ہجر
اللہ ابھی چار پہر رات پڑی ہے
جینے نہیں دیتے ہیں وہ مرنے نہیں دیتے
اے نوحؔ مری جان کشاکش میں پڑی ہے