داغ دہلوی

آپ کیوں‌خاک میں‌ملاتے ہیں
ہم مصیبت طلب ملیں گے آپ
وہی ان کا مطلوب و محبوب ٹھہرا
بجا ہے جو اس کی طلب چاہتے ہیں

مصحفی غلام ہمدانی

یہ روز ڈھونڈ لائے ہے اک خوبرو نیا
شاکی ہیں اپنے ہی دل آفت طلب سے ہم

مصطفٰیٰ خان شیفتہ

میں وصل میں بھی شیفتہ حسرت طلب رہا
گستاخیوں میں بھی مجھے پاسِ ادب رہا
ایسے کریم ہم ہیں کہ دیتے ہیں بے طلب
پہنچاؤ یہ پیام اجلِ جاں طلب تلک
یوں پاس بوالہوس رہیں چشمِ غضب سے دور
یہ بات ہے بڑی دلِ عاشق طلب سے دور
بوس و کنار کی نہ کروں گا ہوس کبھی
یہ خواہشیں ہیں عاشقِ حسرت طلب سے دور

شکیب جلالی

تیرہ ہے خاکداں ‘ تو فلک بے نجوم ہے
لائے کہاں سے مانگ کے دستِ طلب چراغ

عرفان صدیقی

دستِ قاتل پہ گماں دستِ طلب کا ہوتا
نہ ہوا ورنہ یہ نظارہ غضب کا ہوتا
دستِ قاتل پہ گماں دستِ طلب کا ہو گا
کبھی ہو گا تو یہ نظارہ غضب کا ہو گا
خراج مانگ رہی ہے وہ شاہ بانوئے شہر
سو ہم بھی ہدیۂ دستِ طلب گذارتے ہیں
کوئی شے طشت میں ہم سر سے کم قیمت نہیں رکھتے
سو اکثر ہم سے نذرانہ طلب ہوتا ہی رہتا ہے

رئیس فروغؔ

کچھ نہ کچھ حسن ملا ہے سب کو
ہر کوئی داد طلب لگتا ہے
تری بہار کو کس کس لباس میں سوچوں
نفس نفس تو بدلتی ہوئی طلب ہے میاں

احسان دانش

اس طرف وا ہے در رحمت یزداں دانشؔ
اس طرف وسعت دامانِ طلب کچھ بھی نہیں

ضیا جالندھری

کھلیں تو کیسے کھلیں پھول اجاڑ صحرا میں
سحاب خواب نہیں گریۂ طلب بھی نہیں
دے گیا درد بے طلب کوئی
میرا ہمدرد تھا عجب کوئی

خاطر غزنوی

خاطرؔ اب اہلِ دل بھی بنے ہیں زمانہ ساز
کس سے کریں وفا کی طلب اپنے شہر میں

عزیز حامد مدنی

زنجیرِ پا سے آہن شمشیر ہے طلب
شاید تری گلی میں نہ پہنچے یہ شور اب

فراق گورکھپوری

ارباب وفا جان بھی دینے کو ہیں تیار
ہستی کا مگر حسنِ طلب اور ہی کچھ ہے

کلیم عاجز

ہم کو تو بے سوال ملے بے طلب ملے
ہم وہ نہیں ہیں ساقی کہ جب مانگیں تب ملے

محسن احسان

سحر سے ایک کرن کی فقط طلب تھی مجھے
تمام رات مگر بیکلی غضب تھی مجھے

محسن نقوی

زخم کے پھول سے تسکین طلب کرتی ہے
بعض اوقات مری روح غضب کرتی ہے

ناصر کاظمی

ہرچند ترا عہدِ وفا بھول گئے ہم
وہ کشمکشِ صبر طلب یاد رہے گی
دل میں ہر وقت چبھن رہتی تھی
تھی مجھے کس کی طلب یاد نہیں
نہ غمِ زندگی نہ دردِ فراق
دل میں یونہی سی ہے طلب کوئی
تیری زلفوں کے بکھرنے کا سبب ہے کوئی
آنکھ کہتی ہے ترے دل میں طلب ہے کوئی