داغ دہلوی

دن پہلوؤں سے ٹال دیا کچھ نہ کہہ سکے
ہر چند ان کو وصل کا انکار ہی رہا
قسم بھی کھائی تھی قرآن بھی اٹھایا تھا
پھر آج ہے وہی انکار دیکھتے جاؤ
جس سے کیا ہے آپ نے اقرار جی گیا
جس نے سنا ہے آپ سے انکار مر گیا

مصحفی غلام ہمدانی

یاں کی اذیتوں سے ازبسکہ آ گہی تھی
کرتے تھے ہم عدم میں انکار زندگی سے
میں اور کسی بات کا شاکی نہیں تجھ سے
یہ وقت کے اوپر ترا انکار غضب ہے

فیض احمد فیض

دعوتِ بیعتِ شہ پہ ملزم بنا
کوئی اقرار پر، کوئی انکار پر

مرزا رفیع سودا

سوداؔ نے اپنے خوں کی دیت تم سے یک نگاہ
چاہی تو اتنی بات سے انکار کر چلے

باقی صدیقی

ہر بار وہی سوچ وہی زہر کا ساغر
اس پر یہ ستم جرات انکار نہیں ہے

عرفان صدیقی

خود ہی اسے ضرورتِ بیعت نہیں رہی
اب آپ کیا ارادۂ انکار کرتے ہیں
وہی سچ ہے جو آنکھوں سے ہویدا ہوتا رہتا ہے
اگر ہونٹوں سے پوچھو گے تو وہ انکار کردیں گے

الطاف حسین حالی

میں تو میں غیر کو مرنے سے اب انکار نہیں
اک قیامت ہے ترے ہاتھ میں تلوار نہیں
فریب وعدۂ دل دار کی قدر
شہید خنجر انکار سے پوچھ

علی سردار جعفری

اسی سے تیغِ نگہ آب دار ہوتی ہے
تجھے بتاؤں بڑی شے ہے جرأت انکار

غلام محمد قاصر

اب مرے شہر کی پہچان ہے اک وعدہ شکن
شہریت بدلوں کہ تاریخ کا انکار کروں

جلیل مانک پوری

دے رہے ہیں مے وہ اپنے ہاتھ سے
اب یہ شے انکار کے قابل نہیں

جوش ملیح آبادی

مجھ کو وہ بخشتے تھے دو عالم کی نعمتیں
میرے غرور عشق نے انکار کر دیا
ظالم یہ خموشی بے جا ہے اقرار نہیں انکار تو ہو
اک آہ تو نکلے توڑ کے دل نغمے نہ سہی جھنکار تو ہو

سیف الدین سیف

لبِ خاموش کو وا کر ظالم
یہ ہے اقرار کہ انکار کھلے

سیماب اکبر آبادی

اے مستی الفت سبق کفر دیے جا
جب تک مجھے ہر چیز سے انکار نہ ہو جائے

شاذ تمکنت

جاگتے سوتے جزیروں کے دھندلکے میں بلا
پھر اسی طرح مجھے پردۂ انکار سے دیکھ

فراق گورکھپوری

کچھ نہ کچھ عشق کی تاثیر کا اقرار تو ہے
اس کا الزام تغافل پہ کچھ انکار تو ہے
اس میں بھی رابطۂ خاص کی ملتی ہے جھلک
خیر اقرارِ محبت نہ ہو انکار تو ہے
ان کا جو حال کہ پہلے تھا وہی حال رہا
تیرے غم کشتوں سے اقرار نہ انکار چلا

قتیل شفائی

صدمے جھیلوں جان پہ کھیلوں اس سے مجھے انکار نہیں ہے
لیکن ترے پاسِ وفا کا کوئی بھی معیار نہیں ہے

محبوب خزاں

محبت کو گلے کا ہار بھی کرتے نہیں بنتا
کچھ ایسی بات ہے انکار بھی کرتے نہیں بنتا