داغ دہلوی

محبت میں آرام سب چاہتے ہیں
مگر حضرت داغؔ کب چاہتے ہیں

مصحفی غلام ہمدانی

بے لطف زندگی کے ہیں دن آ بھی اے اجل
تیرے ہی انتظار میں بیٹھے ہیں کب سے ہم
گو کہ آنکھوں میں اپنی آوے جان
منہ دکھاتا ہے ہم کو کب کوئی
سوچتا کیا ہے دیکھ دیکھ اسے
بن اٹھائے وہ کب زمیں سے اٹھا
غزل کہنے کا کس کو ڈھب رہا ہے
وہ رتبہ عشق کا اب کب رہا ہے

مصطفٰی خان شیفتہ

تغییر وضع کی ہے اشارہ وداع کا
یعنی جفا پہ خو گرِ الطاف کب رہا
آ جائے کاش موت ہی تسکیں نہ ہو، نہ ہو
ہر وقت بے قرار رہے کوئی کب تلک

فیض احمد فیض

کہاں گئے شبِ فرقت کے جاگنے والے
ستارۂ سحری ہم کلام کب سے ہے

باقی صدیقی

پہروں سونے والے
جاگ رہے ہیں کب سے
بات کرو کچھ باقیؔ
چپ بیٹھے ہو کب سے
آئے نہ خیال میں کسی کے
ہم بیٹھے رہے خموش کب تک
آتی نہیں دلکی بات لب تک
خاموش رہیں گے پھر بھی کب تک
ہم کہاں تک گلہ کریں غم سے
آپ سے بھول کب نہیں ہوتی
ہم کہاں تک گلے کریں باقیؔ
وہ نظر دور کب نہیں ہوتی

قمر جلالوی

پروانہ میری طرح مصیبت میں کب رہا
بس رات بھر جلا تری محفل میں جب رہا

شکیب جلالی

دن ہو اگر‘ تو رات سے تعبیر کیوں کریں
سورج کو اہلِ ہوش دکھاتے ہیں کب چراغ

ضیا جالندھری

کون نکلا ہے اپنی الجھن سے
اور کو پا سکا ہے کب کوئی

عبید اللہ علیم

صدا لگائیں اور اپنا مذاق اڑوائیں
یہ اہلِ درد پہ افتاد کب نہیں آئی

علی سردار جعفری

وہی ہے وحشت وہی ہے نفرت آخر اس کا کیا ہے سبب
انساں انساں بہت رٹا ہے انساں انساں بنے گا کب

شاد عظیم آبادی

خضر کیا ہم تو اس جینے میں بازی سب سے جیتے ہیں
دم اب اکتا گیا اللٰہ اکبر کب سے جیتے ہیں
جیے جائیں گے ہم بھی لب پہ دم جب تک نہیں آتا
ہمیں بھی دیکھنا ہے نامہ بر کب تک نہیں آتا
دل اپنا وادیِ غربت میں شاید مر رہا جا کر
نہ آنے کی بھی اک میعاد ہے کب تک نہیں آتا

احمد فراز

اب آئے ہو تو یہاں کیا ہے دیکھنے کے لیے
یہ شہر کب سے ہے ویراں وہ لوگ کب کے گئے

قتیل شفائی

ستارا سا نظر آتا ہے اوپر سے جہاں پانی
میں خوش فہمی کے اس گہرے کنویں میں کب نہیں اترا

محسن احسان

کنارِ شام پہ سرخی شفق کی دوڑ گئی
لہو اگلنے کی یوں آرزو بھی کب تھی مجھے
میں اپنی ذات کے اندر کبھی نہ جھانک سکا
یہ اور بات کہ یہ آرزو بھی کب تھی مجھے

محسن نقوی

اپنے انصاف کی زنجیر نہ دیکھو کہ یہاں
مفلسی ذہن کی فریاد بھی کب کرتی ہے

ناصر کاظمی

سفرِ منزلِ شب یاد نہیں
لوگ رخصت ہوے کب یاد نہیں

نوح ناروی

اسیرانِ قفس کو واسطہ کیا ان جھمیلوں سے
چمن میں کب خزاں آئی چمن میں کب بہار آئی