مرزا غالب

خانہ ویراں سازی حیرت! تماشا کیجیے
صورتِ نقشِ قدم ہوں رفتۂِ رفتارِ دوست
ثابت ہوا ہے گردن مینا پہ خون خلق
لرزے ہے موجِ مے تری رفتار دیکھ کر
یک قلم کاغذ آتش زدہ ہے صفحۂِ دشت
نقشِ پا میں ہے تپ گرمیِ رفتار ہنوز
رسیدن گلِ باغ واماندگی ہے
عبث محفل آرائے رفتار ہیں ہم

امام بخش ناسخ

کرتی ہے مجھے قتل مرے یار کی رفتار
تلوار کی تلوار ہے رفتار کی رفتار

حیدر علی آتش

اٹھ کے دیوار لحد سے مردے ٹکراتے سر
اک قیامت ہے صنم عالم تری رفتار کا
چھکڑا ہوے ہیں سوچ کے راہِ وفا میں پاؤں
پہیے لگائیے انہیں رفتار کے لیے
قد میں تو کر چکا تھا وہ احمق برابری
مجبور سرو کو تری رفتار نے کیا
چال میں اس کی سراپا ہے کسی کی تقلید
کبک کو یار کی رفتار لیے پھرتی ہے
آخر کار چلے تیر کی رفتار قدم
غیر منزل نہ پڑے راہ میں زنہار قدم
دل ٹھوکریں کھاتا تھا نہ ہر گام کسی کا
اک خاک میں ملتے دم رفتار ہمیں تھے

داغ دہلوی

تمہیں غرض جو کرو رحم پائمالوں پر
تم اپنی شوخی رفتار دیکھتے جاؤ

مصحفی غلام ہمدانی

اول تو یہ دھج اور یہ رفتار غضب ہے
تس پہ ترے پازیب کی جھنکار غضب ہے
کبکِ دری کے لاکھ قفس ہوں جہاں دھرے
دکھلا کے ان کو شوخی رفتار مار ڈال
غوغا ہے شرق و غرب و جنوب و شمال میں
فتنے جگا گئی تری رفتار ہر طرف

مصطفٰی خان شیفتہ

گور میں یاد قدِ یار نے سونے نہ دیا
فتنۂِ حشر کو رفتار نے سونے نہ دیا

مومن خان مومن

چلنا تو دیکھنا کہ قیامت نے بھی قدم
طرزِ خرام و شوخی رفتار کے لیے

مرزا رفیع سودا

ہر نقشِ پا پہ تڑپے ہے یارو ہر ایک دل
ٹک واسطے خدا کے یہ رفتار دیکھنا

باقی صدیقی

کل کہاں تھی آج ہے باقیؔ کہاں
زندگی کتنی سبک رفتار ہے
کیوں صبا کی نہ ہو رفتار غلط
گل غلط غنچے غلط خار غلط
آدمی ساتھ نہیں دے سکتا
تیز ہے سائے کی رفتار ابھی

قمر جلالوی

کس قدر بے کار تھی آہِ شبِ فرقت قمر
ہر ستارہ مسکرایا چرخ کنج رفتار کا

عرفان صدیقی

تمام جادہ شناسوں کی گمرہی کا جواز
ذرا سی مستی رفتار سے نکل آیا
پائے وحشت نے عجب نقش بنائے تھے یہاں
اے ہوائے سرِ صحرا تری رفتار پہ خاک

مصطفی زیدی

پل پل صدیاں بیت گئیں جانے کس دن بدلے گی
ایک تری آہستہ روی ایک زمانے کی رفتار

اختر حسین جعفری

عجب چہرہ سفر کا تھا ہوس کے زرد پانی میں
قدم دلدل سے نکلا تو خط رفتار تک آیا

الطاف حسین حالی

کچھ پتا منزلِ مقصود کا پایا ہم نے
جب یہ جانا کہ ہمیں طاقت رفتار نہیں

ادا جعفری

ابھی کچھ ان کہے الفاظ بھی ہیں کنج مژگاں میں
اگر تم اس طرف آؤ صبا رفتار ہو جانا

عبید اللہ علیم

پاؤں میں گھومتی ہے زمیں آسماں تلک
اس طفلِ شیر خوار کی رفتار دیکھنا