مصحفی غلام ہمدانی

نہ سمجھو تم کہ میں دیوانہ ویرانے میں رہتا ہوں
خیال روئے خوباں سے پری خانے میں رہتا ہوں
شریف کعبہ نت مجھ کو سلامِ شوق بھیجے ہے
میں کافر گرچہ ہندستاں کے بت خانے میں رہتا ہوں
گردش سے پتلیوں کی سرگشتہ ہے زمانہ
مستی سے اس نگہ کی مے خانے باؤلے ہیں

مومن خان مومن

روزِ محشر بھی ہوش گر آیا
جائیں گے ہم شراب خانے کو

یگانہ چنگیزی

عشق سے دل کو ملا آئنہ خانے کا شرف
جگمگا اٹھا کنول اپنے سیہ خانے کا
وائے حسرت کہ تعلق نہ ہوا دل کو کہیں
نہ تو کعبے کا ہوا میں نہ صنم خانے کا
تشنہ لب ساتھ چلے شوق میں سائے کی طرح
رخ کیا ابرِ بہاری نے جو مے خانے کا
اپنی پرچھائیں سے دیوانوں کو نفرت ہی رہی
جیتے جی نکلے نہ زنداں کے سیہ خانے سے

باقی صدیقی

تبصرہ تھا مرے فسانے پر
تان ٹوٹی شراب خانے پر
تم عناں گیر جنوں ہو ورنہ
چور چور آئنہ خانے پاتے

عبدالحمید عدم

ظلمتوں سے نہ ڈر کہ رستے میں
روشنی ہے شراب خانے کی
فقیروں کا جمگھٹ گھڑی دو گھڑی
شرابیں تری بادہ خانے ترے

قمر جلالوی

راستے میں رات کو مڈ بھیڑ ساقی کچھ نا پوچھ
مڑ رہے تھے شیخ جی مسجد کو بت خانے کو ہم
شیخ جی ہوتا ہے اپنا کام اپنے ہاتھ سے
اپنی مسجد کو سنبھالیں آپ بت خانے کو ہم
نہ رکھ قفس میں مگر طعنۂ قفس تو نہ دے
کہ ہم بھی چھوڑ کر آئیں ہیں اپنے خس خانے
حرم کی راہ کو نقصان بت خانے سے کیا ہو گا
خیالاتِ بشر میں انقلاب آنے سے کیا ہو گا
ارے کافر سمجھ لے انقلاب آنے سے کیا ہو گا
بنا کعبہ سے بت خانہ تو بت خانے سے کیا ہو گا
نمازی سوئے مسجد جا رہے ہیں شیخ ابھی تھم جا
نکلتے کوئی دیکھے گا جو مے خانے سے کیا ہو گا

اختر شیرانی

وعدہ اس ماہرو کے آنے کا
یہ نصیبا سیاہ خانے کا
تیری آنکھوں کی ہو نہ ہو تقصیر
نام رسوا شراب خانے کا

اکبر معصوم

اس خوش ادا کے آئنہ خانے میں جاؤں گا
پھر لوٹ کر میں اپنے زمانے میں جاؤں گا

بشیر بدر

اور جام ٹوٹیں گے اس شراب خانے میں
موسموں کے آنے میں موسموں کے جانے میں
کون آیا راستے آئینہ خانے ہو گئے
رات روشن ہو گئی دن بھی سہانے ہو گئے

زہرا نگاہ

یہ کیا ستم ہے کوئی رنگ و بو نہ پہچانے
بہار میں بھی رہے بند تیرے مے خانے

عبید اللہ علیم

ہر لمحہ احساس کی صہبا روح میں ڈھلتی جاتی ہے
زیست کا نشہ کچھ کم ہو تو ہو آئیں مے خانے لوگ

غلام محمد قاصر

وہ لوگ مطمئن ہیں کہ پتھر ہیں ان کے پاس
ہم خوش کہ ہم نے آئینہ خانے بنائے ہیں

جلیل مانک پوری

آشنا ہو کر بتوں کے ہو گئے حق آشنا
ہم نے کعبے کی بنا ڈالی ہے بت خانے کے بعد

سیماب اکبر آبادی

سبو پر جام پر شیشے پہ پیمانے پہ کیا گزری
نہ جانے میں نے توبہ کی تو مے خانے پہ کیا گزری
بتائیں برہمن اور شیخ ان کی خانہ جنگی میں
خدا خانے پہ کیا بیتی صنم خانے پہ کیا گزری
تری ہر سو تجلی اور میری ہر طرف نظریں
تجھے تو یاد ہو گا آئینہ خانے پہ کیا گزری

شاد عظیم آبادی

جس طرف جائے نظر اپنا ہی جلوہ تھا عیاں
جسم میں ہم تھے کہ وحشی آئینہ خانے میں تھا
دون کی لیتا تو ہے زاہد مگر میں کیا کہوں
متقی ساقی سے بڑھ کر کون مے خانے میں تھا

شکیل بدایونی

مجھ کو ساقی نے جو رخصت کیا مے خانے سے
خود مئے ناب چھلکنے لگی پیمانے سے
دیتے ہیں طعنۂ اصنام پرستی مجھ کو
سجدہ کرتے ہوئے جو نکلے ہیں مے خانے سے

فانی بدایونی

کعبہ کو دل کی زیارت کے لیے جاتا ہوں
آستانہ ہے حرم میرے صنم خانے کا
تم نے دیکھا ہے کبھی گھر کو بدلتے ہوئے رنگ
آؤ دیکھو نہ تماشا مرے غم خانے کا
وحدت حسن کے جلووں کی یہ کثرت اے عشق
دل کے ہر ذرے میں عالم ہے پری خانے کا

احمد فراز

زندگی ہم ترے داغوں سے رہے شرمندہ
اور تو ہے کہ سدا آئینہ خانے مانگے

فراق گورکھپوری

ہمیں ہیں گل ہمیں بلبل ہمیں ہوائے چمن
فراقؔ خواب یہ دیکھا ہے قید خانے میں
آج سے پہلے کب تھے وطن میں بے وطنی کے یہ لچھن
لوگوں کو یہ کہتے سنا ہے گھر بھی غربت خانے ہیں

کلیم عاجز

ہم ہیں عاجزؔ آبروئے بزم یاران غزل
اب اسی آئینے سے ہے آئنہ خانے کا نام

کیفی اعظمی

مرے جنون پرستش سے تنگ آ گئے لوگ
سنا ہے بند کیے جا رہے ہیں بت خانے

مجروح سلطان پوری

آ نکل کے میداں میں دو رخی کے خانے سے
کام چل نہیں سکتا اب کسی بہانے سے
تبسموں نے نکھارا ہے کچھ تو ساقی کے
کچھ اہلِ غم کے سنوارے ہوئے ہیں مے خانے

میرا جی

چاند ستارے قید ہیں سارے وقت کے بندی خانے میں
لیکن میں آزاد ہوں ساقی چھوٹے سے پیمانے میں
اپنی بیتی کیسے سنائیں مد مستی کی باتیں ہیں
میراجیؔ کا جیون بیتا پاس کے اک مے خانے میں

نوح ناروی

بطور یادگار زہد مے خانے میں رکھ دینا
مری ٹوٹی ہوئی توبہ کو پیمانے میں رکھ دینا
کہا تھا اے دل نافہم و ناداں تجھ سے یہ کس نے
خدا خانے کی حرمت کو صنم خانے میں رکھ دینا
کہیں آئیں کہیں جائیں کہیں اٹھیں کہیں بیٹھیں
قدم ہر پھر کر اپنا ہم کو بت خانے میں رکھ دینا