مرزا غالب

نہیں گر سر و برگِ ادراک معنی
تماشائے نیرنگ صورت سلامت

بہادر شاہ ظفر

آئینے کو ناز تھا کیا اپنے روئے صاف پر
آنکھ ہی پر دیکھتے ہی تیری صورت کھل گئی

حیدر علی آتش

اے صنم جس نے تجھے چاند سی صورت دی ہے
اسی اللہ نے مجھ کو بھی محبت دی ہے
صورت سے اس کی بہتر صورت نہیں ہے کوئی
دیدار یار سی بھی دولت نہیں ہے کوئی
ہم شاعروں کا حلقہ حلقہ ہے عارفوں کا
نا آشنائے معنٰیِ صورت نہیں ہے کوئی

داغ دہلوی

کیا تصور ہے نہایت مجھے حیرت آئی
آئنے میں بھی نظر تیری ہی صورت آئی
تیری صورت کو دیکھتا ہوں میں
اس کی قدرت کو دیکھتا ہوں میں
دیکھنے آئے ہیں جو میری نبض
ان کی صورت کو دیکھتا ہوں میں
کیا عجب ہے گر ترا ثانی نہیں
اچھی صورت ایک صورت ہو گئی
نقشہ بگڑا رہتے رہتے غصہ ناک
کٹ کھنی قاتل کی صورت ہو گئی

شیخ ابراہیم ذوق

دل صاف ہو تو چاہیے معنی پرست ہو
آئینہ خاک صاف ہے صورت پرست ہے

مصحفی غلام ہمدانی

بیاں جو جو کہ صورت تجھ سے کی ہے میں نے اے قاصد
تو اس کے کان میں جھک کر اسی صورت سے کہہ دیجو

مصطفٰی خان شیفتہ

جلوۂِ معنی نظر آنے لگا
پیتے پیتے مے یہ صورت ہو گئی

جون ایلیا

پھر بنایا خدا نے آدم کو
اپنی صورت پہ ایسی صورت میں
اب تو نظر میں آ جا بانہوں کے گھر میں آ جا
اے جان تیری کوئی صورت نہیں ہے مجھ میں

قمر جلالوی

دیکھا تھا آج ہم نے قمر کو خدا گواہ
پہلی سی اب غریبوں کی صورت نہیں رہی

عرفان صدیقی

اس آئینہ خانے کی طرف دیکھتے ہیں ہم
پھر کوئی زیارت کسی صورت نہیں کرتے
عمر کیا چیز ہے احساسِ زیاں کے آگے
ایک ہی شب میں بدل جاتی ہے صورت کیسی
یا کیا جائے مجھے خوش نظری سے آزاد
یا اسی دشت میں پیدا کوئی صورت کی جائے

احسان دانش

ہے میرا عشق یک در گیر محکم گیر سے بالا
مری نظروں میں دنیا خوب صورت ہوتی جاتی ہے

بشیر بدر

خاندانی رشتوں میں اکثر رقابت ہے بہت
گھر سے نکلو تو یہ دنیا خوب صورت ہے بہت

بیان میرٹھی

تلاش جلوۂ معنی میں ٹکرایا کئے سجدے
نہ ٹوٹا دست خشک زہد سے بت خانہ صورت کا

جلیل مانک پوری

عکس ہے آئینۂ دہر میں صورت میری
کچھ حقیقت نہیں اتنی ہے حقیقت میری
آئینے سے انہیں کچھ انس نہیں بات یہ ہے
چاہتے ہیں کوئی دیکھا کرے صورت میری

جوش ملیح آبادی

محو ہو جاتا ہوں اکثر میں کہ دشمن ہوں ترا
دل کشی کس درجہ اے دنیا تری صورت میں ہے
میری حالت دیکھیے اور ان کی صورت دیکھیے
پھر نگاہ غور سے قانون قدرت دیکھیے
مسکرا کر اس طرح آیا نہ کیجے سامنے
کس قدر کمزور ہوں میں، میری صورت دیکھیے
دور اندیش مریضوں کی یہ عادت دیکھی
ہر طرف دیکھ لیا جب تری صورت دیکھی
قوتیں ضبط کی ہر چند سنبھالے تھیں مجھے
پھر بھی ڈرتے ہوئے میں نے تری صورت دیکھی
محفل حشر میں یہ کون ہے میر مجلس
یہ تو ہم نے کوئی دیکھی ہوئی صورت دیکھی

رسا چغتائی

کون پوچھے یہ میرؔ صاحب سے
ان دنوں کیا جنوں کی صورت ہے
آگ میں کیا گل معانی ہیں
خاک میں کیا نمو کی صورت ہے

شکیل بدایونی

مری شامِ الم صبح مسرت ہوتی جاتی ہے
کہ ہر لحظہ ترے ملنے کی صورت ہوتی جاتی ہے

فانی بدایونی

مر کر مریضِ غم کی وہ حالت نہیں رہی
یعنی وہ اضطراب کی صورت نہیں رہی
پتھرا گئی تھی آنکھ مگر بند تو نہ تھی
اب یہ بھی انتظار کی صورت نہیں رہی
فانیؔ امید مرگ نے بھی دے دیا جواب
جینے کی ہجر میں کوئی صورت نہیں رہی

شاذ تمکنت

نہ محفل ایسی ہوتی ہے نہ خلوت ایسی ہوتی ہے
مرے معبود کیا جینے کی صورت ایسی ہوتی ہے
کوئی دیکھے تجھے تو از سرِ نو زندگی مانگے
روایت جھوٹ ہے قاتل کی صورت ایسی ہوتی ہے

فراق گورکھپوری

فرق آ گیا تھا دور حیات و ممات میں
آئی ہے آج یاد وہ صورت کہاں کہاں

ناصر کاظمی

جوش جنوں میں درد کی طغیانیوں کے ساتھ
اشکوں میں ڈھل گئی تری صورت کبھی کبھی